مسجد نبوی کے موذن شیخ فیصل نعمان انتقال کرگئے‘ نماز جنازہ کے بعد جنت البقیع میں سپرد خاک کردیئے گئے۔سماجی رابطے کی ویب سائٹ ایکس پر حرمین شریفین انتظامیہ کی جانب سے پوسٹ شیئر کرتے ہوئے بتایا گیا کہ شیخ فیصل نعمان کا انتقال بروز22 دسمبر کو ہوا۔ ان کی نمازِ جنازہ 23 دسمبر کو بعداز نمازِ فجر مسجد نبویؐ میں ادا کرنے کے بعد انہیں جنت البقیع قبرستان میں سپردِ خاک کیا گیا۔ان سائیڈ حرمین کی جانب سے سوشل میڈیا پرشیخ فیصل نعمان کی جانب سے دی جانے والی آخری اذان کی ویڈیو بھی شیئر کی گئی ہے، جو انہوں نے 2 نومبر کو دی تھی۔

حرمین شریفین انتظامیہ کے مطابق شیخ فیصل نعمان کو 2001 میں مسجد نبوی کا مذن مقرر کیا گیا تھا۔ اذان دینا موذن کے خاندان کی روایت رہی ہے۔ ان کے والد اور دادا بھی مسجد نبوی میں موذن کے فرائض انجام دے چکے ہیں۔انتظامیہ کے مطابق شیخ فیصل کے والد کو صرف 14 سال کی عمر میں موذن مقرر کیا گیا تھا۔ انہوں نے آخری وقت تک مسجد نبوی میں اپنی خدمات انجام دیں۔ ان کا انتقال 90 سے زائد عمر میں ہوا تھا۔ والد کے انتقال کے بعد شیخ فیصل نے یہ فریضہ سنبھالا اور 25 برس تک خدمات انجام دیں۔

کریڈٹ: انڈیپنڈنٹ نیوز پاکستان-آئی این پی