جامشورو کی ضلعی انتظامیہ نے حضرت لعل شہباز قلندر کے 774ویں سالانہ عرس کے موقع پر آج (ہفتہ کو) ضلع میں مقامی تعطیل کا اعلان کر دیا ۔ اس حوالے سے ڈپٹی کمشنر آفس جامشورو کی جانب سے باقاعدہ نوٹیفکیشن جاری کیا گیا ہے۔جاری اعلامیے کے مطابق یہ تعطیل صرف ضلع جامشورو کی حدود تک محدود ہوگی اور اس روز تمام سرکاری دفاتر اور سرکاری ادارے بند رہیں گے۔ تعطیل کا مقصد عرس کی تقریبات میں شرکت کے لیے آنے والے زائرین کو سہولت فراہم کرنا اور انتظامات کو بہتر بنانا ہے۔نوٹیفکیشن میں بتایا گیا ہے کہ یہ تعطیل 18 شعبان 1447 ہجری کو ہونے والی سالانہ عرس تقریبات کے سلسلے میں دی جا رہی ہے۔ ضلعی انتظامیہ کے مطابق ہر سال اس موقع پر ہزاروں عقیدت مند حضرت لعل شہباز قلندر کے مزار پر حاضری دیتے ہیں اور مذہبی رسومات میں حصہ لیتے ہیں۔

یہ حکم ڈپٹی کمشنر جامشورو اور چیئرمین ڈسٹرکٹ عشر کمیٹی غضنفر علی قادری کے دستخط سے جاری کیا گیا ہے، جس میں تمام متعلقہ اداروں کو تعطیل پر عملدرآمد کی ہدایت کی گئی ہے۔عرس کے دوران مزار کے احاطے اور اطراف میں خصوصی سیکیورٹی اور انتظامی اقدامات بھی کیے جاتے ہیں تاکہ زائرین کو کسی قسم کی دشواری کا سامنا نہ ہو۔ تقریبات میں اجتماعی دعائیں، محافلِ ذکر اور دیگر روایتی مذہبی رسومات شامل ہوتی ہیں، جن میں ملک بھر سے آنے والے عقیدت مند شرکت کرتے ہیں۔ضلعی انتظامیہ نے شہریوں کو ہدایت کی ہے کہ وہ اپنے معمولات اسی حساب سے ترتیب دیں کیونکہ تعطیل کے باعث سرکاری امور ایک دن کے لیے معطل رہیں گے جبکہ معمول کے مطابق سرکاری سرگرمیاں تعطیل کے اگلے روز دوبارہ شروع ہو جائیں گی۔

کریڈٹ: انڈیپنڈنٹ نیوز پاکستان-آئی این پی