بیجنگ(شِنہوا) چین میں غیرملکی فنڈنگ سے کام کرنے والی 80 فیصد سے زائد  کمپنیاں ملک کے کاروباری ماحول سے مطمئن ہیں۔

چین کی کونسل برائے فروغ بین الاقوامی تجارت کے ترجمان یانگ فان نے منگل کو ایک پریس کانفرنس میں بتایا کہ 2023 کی چوتھی سہ ماہی کے دوران تقریباً 600 کاروباری اداروں سے کیے گئے سروے سے یہ بات معلوم ہوئی کہ سروے میں شامل 90 فیصد سے زائد جواب دہندگان نے چینی مارکیٹ کو انتہائی پرکشش قرار دیا جبکہ  تقریباً 70 فیصد نے اگلے پانچ سالوں میں مارکیٹ امکانات کے بارے میں اپنی امید کا اظہار کیا۔

یانگ نے کہا کہ چینی معیشت کے بنیادی اصول طویل مدت کے لیے مستحکم اور مضبوط رہیں گے اور غیر ملکی سرمایہ کاری کے لیے چینی مارکیٹ کی 'مقناطیسی کشش' مزید مضبوط ہو جائے گی۔

سروے میں شامل تمام غیرملکی کمپنیوں میں سے 68 فیصد مائیکرو اور چھوٹے کاروباری ادارے اور 65 فیصد چین میں پروسیسنگ اور مینوفیکچرنگ کے عمل میں مصروف ہیں۔

سروے سے یہ بات سامنے آئی کہ چوتھی سہ ماہی کے دوران چین کے کاروباری ماحول سے غیر ملکی اداروں کے اطمینان میں مسلسل بہتری آئی ہے۔ مارکیٹ تک رسائی، ٹیکسوں اور تجارتی تنازعات کے حل سمیت مختلف حوالوں سے 90 فیصد سے زیادہ کاروباری اداروں نے اپنے اطمینان کا اظہار کیا۔