بریٹیسلاوا(شِنہوا)سلواکیہ کے ایک اقتصادی ماہرنے کہا ہے کہ موسمیات، تجارت اور ٹیکنالوجی جیسے مختلف شعبوں میں یورپ اور چین کے مشترکہ مفادات ہیں اور یورپی یونین (ای یو) اور چین کے درمیان تعاون انتہائی ضروری ہے۔
سلوواک اکیڈمی آف سائنسز کے انسٹی ٹیوٹ آف اکنامک ریسرچ کے سابق سربراہ جوراج سیپکو نے شِنہوا کو دیے گئے ایک انٹرویو میں کہا کہ دنیا کو اس وقت موسمیاتی تبدیلی، کورونا وائرس کی وبا کے بعد کے اثرات اور متعدد تنازعات کی شکل میں تین بڑے مسائل کا سامنا ہے۔ ان مسائل کے مشترکہ نتائج جیو اکنامک بلاکس اور عالمی سطح پر ٹوٹ پھوٹ کا باعث بنے ہیں۔ اس بات کا ذکر کرتے ہوئے کہ عالمی معیشت اس وقت "بہت کم اقتصادی ترقی، بہت زیادہ شرح سود، بہت زیادہ افراط زر اور بہت زیادہ سرکاری قرض" کی لپیٹ میں ہے انہوں نے اس بات پر زور دیا کہ عالمی سطح پر تقسیم کے رجحان کا مقابلہ کرنے کا واحد راستہ بین الاقوامی تعاون ہے۔ انہوں نے کہا کہ یورپی یونین اور چین نہ صرف تجارت بلکہ زندگی کے تمام شعبوں میں ایک دوسرے کے ساتھ مل کر کام کرنے اورایک دوسرے سے سیکھتے ہوئے فائدہ اٹھا سکتے ہیں۔
