تہران (شِنہوا) ایران کے وزیر خارجہ حسین امیر عبداللہیان نے برکس ممالک کی جانب سے عالمی سطح پر بڑی آمادگی کے ساتھ آزادانہ اور مئو ثر کردار ادا کرنے کی تعریف کرتے ہوئے کہا ہے کہ برکس کثیر الجہتی کو فروغ دینے کے سلسلے میں ایران کے لئے سازگار ہدف ہے۔

انہوں نے یہ تبصرہ انسٹا گرام پر برکس کی صلاحیتوں اور ایران کی تنظیم میں شمولیت کی خواہش کی وجوہات بارے  وضاحت کرتے ہوئے کیا۔

امیر عبداللہیان نے مزید کہا کہ برکس ممالک کی   تین ارب سے زائد آبادی دنیا کی 40 فیصد آبادی کے برابر ہے جو کہ دنیا کے ایک تہائی رقبے کے ساتھ ایران کے ہمراہ اہم تعاون کے حامل ہیں۔

انہوں نے ایران کی  صلاحیتوں کا خصوصی طور پر ذکر کیا جس کے مطا بق برکس اراکین کو اس کے جیو پولیٹیکل اور جیو اسٹریٹجک محل وقوع، توانائی کے بھرپور وسائل، ہنر مند، خصوصی اور مئو ثر افرادی قوت، مختلف شعبوں میں قابل توجہ پیشرفت اور سیاسی استحکام کے طور پر فائدہ پہنچا سکتی ہیں۔

جنوبی افریقہ کے شہر جوہانسبرگ میں منعقد ہونے والے 15 ویں برکس سربراہ اجلاس میں اعلان کیا گیا ہے کہ ایران، ارجنٹائن، مصر، ایتھوپیا، سعودی عرب اور متحدہ عرب امارات سمیت چھ ممالک کو گروپ میں شمولیت کی دعوت دی گئی ہے اور ان کی رکنیت یکم جنوری 2024 سے نافذ العمل ہوگی۔

انہوں نے کہا کہ 2015 میں ایران اور عالمی طاقتوں کے درمیان طے پانے والے جوہری معاہدے سے امریکہ کی دستبرداری، روس ۔یوکرین تنازعہ اور دیگر بین الاقوامی واقعات نے روایتی بین الاقوامی اتحادوں کے منفی کردار کو اچھی طرح ثابت کیا ہے۔