منیلا(شِنہوا)ایشیائی ترقیاتی بینک (اے ڈی بی) نے سینئر ماہر اقتصادی امور صفدر پرویز کو چین کے لیے اپنا کنٹری ڈائریکٹر مقرر کیا ہے۔
یہ بات منیلا میں قائم بینک نے پیر کو بتائی۔ صفدر پرویز گزشتہ ماہ اپنی تقرری کے بعد بیجنگ پہنچے ہیں۔ کنٹری ڈائریکٹر کے طور پر وہ چین میں ایشیائی ترقیاتی بنک کے آپریشنز کی نگرانی کریں گے جس میں ملکی شراکت کی حکمت عملی ( سی پی ایس) کو نافذ کرنا بھی شامل ہے جس کے تحت اعلیٰ معیار کی پائیدار اور ماحول دوست ترقی ترجیح ہے۔
صفدرپرویز نے اپنے ایک بیان میں کہا کہ وہ چینی حکومت اور دیگر اہم شراکت داروں کے ساتھ اے ڈی بی کی دیرینہ شراکت داری کو مضبوط بنانے کے خواہاں ہیں۔ انہوں نے کہا کہ اے ڈی بی ماحولیاتی طور پر پائیدار ترقی ،موسمیاتی تبدیلیوں سے موافقت اور انکے منفی اثرات میں کمی کو یقینی بنانے میں ایک اہم شراکت دار کے طور پر چین کے ساتھ موثرانداز میں کام کوجاری رکھے گا۔
انہوں نے کہا کہ خاص طور پر اے ڈی بی تحفظِ صحت اور معاشرے میں عمر رسیدہ افراد میں اضافے کے مسائل کے حل کے لیے مل کر کام کرے گا۔ انہوں نے مزید کہا کہ سب سے اہم بات یہ ہے کہ ہم چین اور اے ڈی بی کے ترقی پذیر رکن ممالک کے درمیان علم اور بہترین طریقوں کے تبادلے میں سہولت فراہم کریں گے تاکہ قابل تقلید ترقیاتی ماڈلز کی حمایت کی جا سکے۔
صفدرپرویز 26 سال سے زائد پیشہ ورانہ تجربے کے حامل ہیں، جس میں اے ڈبی کے ساتھ 20 سال سے زیادہ کا تجربہ بھی شامل ہے۔
انہوں نے 2002 میں اے ڈی بی میں شمولیت اختیار کی اور مرکزی اور مغربی ایشیا میں علاقائی تعاون اور آپریشنز کوآرڈینیشن کے ڈائریکٹر اور مشرقی ایشیا میں مشیر سمیت اعلیٰ عہدوں پر فائز رہے۔ وہ اے ڈی بی کی کارپوریٹ حکمت عملی کی کئی اصلاحات اور اقدامات میں کلیدی رہنما رہے ہیں۔
صفدرپرویز پاکستانی شہری ہیں جنہوں نے معاشیات میں دو ماسٹرز ڈگریاں لے رکھی ہیں۔
