بیجنگ (شِںہوا) چینی وزارت خارجہ کے ترجمان نے کہا ہے کہ متعدد مر تبہ حقائق سے ثابت ہو چکا ہے کہ ہر اعتبار سے امریکہ "جھوٹ کی سلطنت" ہے۔
ترجمان نے یہ بات امریکی محکمہ خارجہ کی ایک حالیہ رپورٹ کے جواب میں کہی ہے جس میں امریکہ نے یہ دعویٰ کیا تھا کہ چین نے عالمی سطح پر غلط معلومات پھیلانے کے لیے اربوں ڈالرز کی سرمایہ کاری کی ہے۔
ترجمان نے کہا کہ امریکی محکمہ خارجہ کی رپورٹ غلط معلومات پر مبنی ہے کیونکہ اس میں حقائق اور صداقت کو غلط طریقے سے پیش کیا گیا ہے۔
ترجمان نے کہا کہ اصل حقائق کے مطابق امریکہ ایسا ملک ہے جس نے بین الاقوامی اطلاعات کے ذرائع کو بطورہتھیار استعمال کیا۔ امریکی محکمہ خارجہ کا متعلقہ مرکز جس نے یہ رپورٹ تیار کی ہے وہ "عالمی مصروفیت" کے نام پر پروپیگنڈہ اور دراندازی میں مصروف ہے۔ یہ غلط معلومات کا ذریعہ اور "نقطہ نگاہ کی جنگ" کا کمانڈ سینٹر ہے۔
ترجمان نے کہا کہ سرد جنگ میں پروپیگنڈہ مقاصد کے لیے میڈیا کو رشوت دینے والے آپریشن موکنگ برڈ سے لیکر "سفید پاؤڈر کی ایک شیشی" اور "وائٹ ہیلمٹس" کی ایک ویڈیو تک کو رواں صدی کے اوائل میں عراق و شام میں جارحیت شروع کرنے کے ثبوت کے طور پر پیش کیا گیا۔
اس کے علاوہ چین کی سنکیانگ پالیسی کو بدنام کرنے کے لئے وسیع پیمانے پر جھوٹ بولا گیا۔ حقائق نے بار بار ثابت کیا ہے کہ امریکہ "جھوٹ کی سلطنت" ہے۔ امریکہ میں سینیٹر رینڈ پال جیسے کچھ افراد نے بھی تسلیم کیا کہ امریکی حکومت دنیا کی تاریخ میں غلط معلومات پھیلانے والی سب سے بڑی پروپیگنڈہ مشنیری ہے۔
ترجمان کے مطابق امریکہ میں کچھ افراد یہ سو چتے ہیں کہ وہ جھوٹ کے ذریعے معلومات کی جنگ میں غالب آسکتے ہیں تاہم وہ بھول گئے ہیں کہ دنیا کے لوگ اندھے نہیں ہیں۔
