تہران(شِنہوا) ایران کے ایک اعلیٰ سکیورٹی عہدیدار نے کہا ہے کہ امریکہ دوسرے ممالک کی حکمرانی میں مداخلت کے لئے طاقتور آن لائن پلیٹ فارمز کا استعمال کر رہا ہے۔

جنوبی افریقہ کے جوہانسبرگ میں برکس قومی سلامتی کے مشیروں اور قومی سلامتی سے متعلق اعلٰی نمائندوں کے 13 ویں اجلاس میں سپریم نیشنل سکیورٹی کونسل کے سیکرٹری علی اکبر احمدیان نے کہا کہ گوگل، ٹویٹر اور انسٹاگرام جیسے عالمی انٹرنیٹ پلیٹ فارمز کی ملکیت کے ذریعے امریکہ بین الاقوامی سائبر اسپیس کو اپنی حاکمیت سمجھتے ہوئے  دوسرے ممالک کی حکمرانی خاص طور پر قومی سلامتی کے شعبوں میں اثر انداز ہونا چاہتا ہے۔ 

احمدیان نے مزید کہا کہ بیشتر امریکی انٹرنیٹ پلیٹ فارمز  کی غیر مجاز سرگرمیاں  ایران سمیت مختلف ریاستوں میں متعدد سکیورٹی چیلنجز کا باعث بنی ہیں ۔

 انہوں نے مزید کہا کہ کسی بھی ملک کے سائبر اسپیس کا انتظام صرف اس کی اپنی حکومت کے ذریعے کیا جانا چاہئے۔

انہوں نے مزید کہا کہ سائبر اسپیس میں غیر جانبدار بین الاقوامی قوانین کی کمی نے امریکی حکومت کو دوسرے ممالک کے اندرونی معاملات میں مداخلت کرنے اور ان کی سلامتی پر سمجھوتہ کرنے کی اجازت دی۔