ہانگ کانگ (شِنہوا) ہانگ کانگ خصوصی انتظامی علاقے (ایچ کے ایس اے آر) میں چینی وزارت خارجہ کے کمشنر دفتر نے امریکی ایوان کی خارجہ امور کمیٹی کی جانب سے نام نہاد ہانگ کانگ اکنامک اینڈ ٹریڈ آفس سرٹیفیکیشن ایکٹ کی منظوری کی شدید مذمت کرتے ہوئے اسے سختی سے مسترد کر دیا ہے، اس ایکٹ کو کچھ چین مخالف قانون سازوں نے تجویز کیا ہے۔ دفتر کے ترجمان نے کہا کہ اس ایکٹ میں امریکہ میں اکنامک اینڈ ٹریڈ آفسز (ای ٹی اوز) کی مراعات اور استثنیٰ کو منسوخ اور ای ٹی اوز کو بند کرنے کا مطالبہ کیا گیا ہے، جو ہانگ کانگ کے معاملات اور چین کے اندرونی امور میں مداخلت ہے۔ دفتر نے امریکہ  پر زور دیا کہ وہ فوری طور پر اس اقدام کوواپس اور ایکٹ پر مزید پیش رفت کو روک دے۔  ترجمان نے کہا کہ مرکزی حکومت کی مکمل حمایت اور معاشرے کے تمام شعبوں کی مشترکہ کوششوں سے ہانگ کانگ "ایک ملک، دو نظام" کے درست راستے پر ثابت قدمی سے آگے بڑھ رہا ہے۔ ایک عالمی مالیاتی، جہاز رانی اور تجارتی مرکز کے طور پر ہانگ کانگ کی پوزیشن کو مستحکم کیا گیا ہے اور اس کی آزادی اور کھلے پن کے ساتھ ساتھ عالمی معیار کے کاروباری ماحول کو مزید بہتر کیا گیا ہے اور قانون کی حکمرانی پر اس کا واضح موقف ہے۔