بیجنگ(شِنہوا) ہنگری کے انسٹی ٹیوٹ آف انٹرنیشنل افیئرز کے صدر گلیڈن جان پاپن نے کہا ہے کہ 10سال قبل چین کی طرف سے تجویز کردہ بیلٹ اینڈ روڈ منصوبہ  (بی آر آئی) ممالک کو قریب لا کر دنیا کی اقتصادی بہبود اور سلامتی میں اہم کردار ادا کررہا ہے۔

حال ہی میں بیجنگ میں منعقدہ 8 ویں چائنہ گلوبل تھنک ٹینک انوویشن فورم کے موقع پر پاپن نے شِنہوا کو دئے گئے انٹرویو میں  کہا کہ یورپی ممالک کو چین کو "خطرے" کی بجائے ایک  "موقع" کے طور پر دیکھنا چاہیے، اور یہ چیز یورپی ممالک کے ساتھ بات چیت کی بنیاد ہے۔

انہوں نے کہا کہ بی آر آئی کی طرف سے پیش کیا گیا ماڈل بنیادی ڈھانچے کی تعمیر،خوشگوار روابط اور عوام سے عوام کے رابطوں کی طرف ایک بہترین موقع  فراہم کرتا ہے اور اس کی پوری دنیا کو اشد ضرورت ہے۔

چین کے ساتھ بی آر آئی تعاون معاہدے پر دستخط کرنے والے پہلے یورپی ملک کے طور پر، حالیہ برسوں میں ہنگری کے چین کے ساتھ اقتصادی تعلقات میں بہتری آئی ہے۔

انہوں نے کہا کہ بی آر آئی ایک ایسا منصوبہ ہے جس سے ہر ایک کو فائدہ اٹھانا چاہیے اور یورپی رہنماؤں کو اس کا حصہ بننے پر زیادہ فخر ہونا چاہیے۔

انہوں نے مارچ میں چین سے متعلقہ پالیسی بیان میں یورپی کمیشن کی صدر ارسولا وان ڈیر کی طرف سے پیش  کردہ "ڈی رسکنگ" کی اصطلاح کو مسترد کر دیا۔

ان کا کہنا تھا کہ جیسا کہ ہمارے ملک کے وزیر خارجہ نے کہا کہ  اصل خطرہ ڈی رسکنگ خود ہے، معاشی طور پر جتنی زیادہ چیزیں منقطع کی جائیں گی، غلط فہمی اور غربت میں اضافے اور معاشی زوال کے امکانات اتنے ہی زیادہ ہوں گے۔