بیجنگ(شِنہوا)چین کے دارالحکومت بیجنگ میں یوم مئی کی تعطیلات کے دوران 91لاکھ سیاحوں کی آمد ہوئی،سیاحوں کی یہ تعداد گزشتہ سال کے مقابلے میں 198.2 فیصد اور2019 میں کوویڈ سے پہلے کے مقابلے میں 6.6 فیصد زیادہ ہے۔

میونسپل بیورو آف کلچر اینڈ ٹورازم کی جانب سے جمعرات کوجاری اعدادوشمار کے مطابق  پانچ روزہ تعطیلات میں سیاحت کی مد میں ہونے والی مجموعی آمدنی 13ارب 50کروڑ یوآن(1ارب96کروڑ ڈالر) رہی جو گزشتہ سال سے752.3 فیصد اور2019 کے اعداد و شمار سے 13.9 فیصد زیادہ ہے۔

تعطیلات کے دوران شہرمیں  سیاحوں کی جانب سے کیے گئے فی کس اخراجات 1474.4 یوآن تک پہنچ گئے جو 2019 کے مقابلے میں 6.8 فیصد زیادہ ہیں۔ بیجنگ میں تعطیلات کے دوران مختلف ثقافتی سیاحتی سرگرمیوں کا انعقاد کیا گیا جس میں شہر کے 166 تھیٹرز کی جانب سے1ہزار473 پرفارمنسز پیش کی گئیں،جن میں ڈراموں، اوپرا اور میوزیکل سے لے کر بچوں کے ڈرامے شامل تھے، جنہیں 4لاکھ 50ہزار کے قریب شائقین نے دیکھا، جبکہ باکس آفس پرآمدنی 8کروڑ73لاکھ 80ہزاریوآن رہی۔