بیجنگ (شِنہوا) چینی وزارت خارجہ کے ایک ترجمان نے کہا ہے کہ برکس کی توسیع تعاون کا ایک نیا نقطہ آغاز ہے جو کہ برکس تعاون میکانزم میں نئی رفتار پیدا کرے گی۔

برکس کا 15 واں سربراہ اجلاس جنوبی افریقہ کے شہر جوہانسبرگ میں 22 سے 24 اگست تک منعقد ہوا جس میں  سعودی عرب، مصر، متحدہ عرب امارات، ارجنٹائن، ایران اور ایتھوپیا کو تنظیم کی رکنیت دی گئی ۔

ترجمان نے کہا کہ سربراہ اجلاس میں چینی صدر شی جن پھنگ اور دیگر برکس ممالک کے رہنماؤں نے متفقہ طور پر 6 ممالک کو برکس  کا رکن بنانے پر اتفاق کیا۔

ترجمان کے مطابق اعلان کردہ توسیع اہم تاریخی اہمیت کی حامل ہے۔ چین کی صدارت میں برکس نے گزشتہ برس توسیع کا عمل شروع کیا تھا ۔ اس کے بعد سے چین اس عمل کو آگے بڑھانے میں برکس کے دیگر ارکان کے ساتھ ملکر کام کر تا رہا ہے۔

ترجمان نے کہا کہ متعدد ابھرتی منڈیوں اور ترقی پذیر ممالک نے برکس میں شمولیت پر غور کیا جس میں 20 سے زیادہ ممالک نے درخواستیں جمع کرائی تھیں ۔ یہ برکس کی اہمیت اور تعاون میں ابھرتی منڈیوں اور ترقی پذیر ممالک کے جوش و خروش اور خواہشات کو ظاہر کرتی  ہیں۔

ترجمان کے مطابق یہ توسیع برکس ممالک کے دوست ترقی پذیر ممالک کے ساتھ اتحاد اور تعاون کا عزم ظاہر کرتی ہے۔ یہ عالمی برادری کی توقعات پر پورا اترتی اور ابھرتی منڈیوں اور ترقی پذیر ممالک کے مشترکہ مفادات کو پورا کرتی ہے۔

ترجمان نے کہا کہ یہ برکس تعاون میں ایک نیا نقطہ آغاز بھی ہے جو برکس تعاون میکانزم میں نئی تحریک پیدا کرے گا اور عالمی امن اور ترقی میں درکار قوت کو مزید وسعت دے گا۔