شنگھائی (شِنہوا)چھٹی چائنہ انٹرنیشنل امپورٹ ایکسپو (سی آئی آئی ای) میں ایک سال تک اشیا اور خدمات کی خریداری کے لیے مجموعی طور پر78ارب41کروڑ ڈالر مالیت کےریکارڈ ابتدائی سودے ہوئے۔

سی آئی آئی ای بیورو کے ڈپٹی ڈائریکٹر سن چھنگھائی نے جمعہ کو ایک پریس کانفرنس میں بتایا کہ یہ تعداد گزشتہ سال کے مقابلے میں 6.7 فیصد زیادہ ہے۔

سن نے بتایا کہ ایکسپو میں 154 ممالک، خطوں اور بین الاقوامی تنظیموں کے نمائندوں نے شرکت کی،اور یہ کہ 128 ممالک اور خطوں کے 3ہزار400 سے زائد کاروباری اداروں نے نمائش میں شرکت کی، جس میں 442 نئی مصنوعات، ٹیکنالوجیز اور خدمات کی نمائش کی گئی۔عہدیدار نے بتایا کہ شرکاء میں 289 فارچیون 500 کمپنیاں اور صنعتی رہنما شامل ہوئے  جو ایک ریکارڈ تعداد ہے۔

انوویشن انکیوبیشن زون میں، اس سال کی سی آئی آئی ای میں 39 ممالک اور خطوں کے 300 سے زیادہ جدید منصوبے نمائش کے لیے رکھے گئے۔ اس سال جدید منصوبوں کی تعداد گزشتہ دو سالوں کے مشترکہ منصوبوں سے زیادہ رہی۔