جینان(شِنہوا)چین میں پارٹی کے سابق سربراہ اور چائنہ لائف انشورنس(گروپ) کمپنی کےچیئرمین وانگ بن کورشوت خوری اوراثاثے بیرون ملک چھپانے کے جرم میں دو سال کی مہلت کے ساتھ موت کی سزا سنائی گئی۔

یہ فیصلہ چین کےمشرقی صوبہ شان ڈونگ میں جینان کی انٹرمیڈیٹ پیپلز کورٹ نے جاری کیا۔

فیصلے میں کہا گیا کہ 1997 اور 2021 کے درمیان وانگ نے مختلف مالیاتی اداروں میں اپنے عہدوں کا فائدہ اٹھا کر دوسروں کے لیے فوائد حاصل کیے اور اس کے بدلے میں غیر قانونی طور پر32 کروڑ 50 لاکھ یوآن (تقریباً 4 کروڑ50 لاکھ ڈالر) مالیت کی رقم اور قیمتی اشیا براہ راست یا اپنے رشتہ داروں کے ذریعے وصول کیں۔

عدالت کے مطابق وہ جنوری2012 میں ہانگ کانگ میں اپنےرشتہ داروں کےذریعےکھولےگئےکھاتوں میں5 کروڑ64 لاکھ20 ہزار یوآن مالیت کی غیرملکی کرنسی جمع کرنے اور اثاثوں کو چھپانے کا بھی مجرم پایا گیا جس سے متعلقہ غیر ملکی زرمبادلہ کے انتظامی ضوابط اور ریاستی اداروں کےقواعد ضوابط کی خلاف ورزی ہوئی۔ 

فیصلے کے مطابق مدعا علیہ کو تاحیات سیاسی حقوق سے محروم کر دیا گیا ہے اور اس کی ذاتی جائیدادیں ضبط کر لی گئی ہیں۔

 عدالت نے کہا کہ دو سال کی مہلت کے بعد وانگ کی سزائے موت کو قانون کے مطابق عمر قید میں تبدیل کیا جا سکتا ہے لیکن مزید کوئی کمی یا پیرول نہیں دیا جائے گا۔