نان ننگ (شِنہوا) چین کے جنوبی گوانگ شی ژوآنگ خوداختیار خطے کے صدر مقام نان ننگ میں عالمی جنگلات صنعت کانفرنس کا آغاز ہو گیا جس میں40 ارب یوآن (تقریباً 5.6 ارب امریکی ڈالرز) کے 30 سے زائد معاہدے ہوئے ۔

" سبز جنگلات صنعت، تعاون کا روشن مستقبل" کے عنوان سے منعقدہ اس کانفرنس کا مقصد جنگلات شعبے میں مواصلات اور تعاون بارے ایک پیشہ ورانہ پلیٹ فارم قائم کرنا ہے۔

کانفرنس میں 5 ہزار سے زائد افراد نے شرکت کی جن میں جنگلات کی کاشت ، کاغذ سازی اور جنگلات صنعت کی مشینری تیار کرنے والی معروف ملکی اور غیرملکی کمپنیوں کے نمائندے بھی شامل تھے۔ کانفرنس کا اہتمام قومی جنگلات اور سبزہ زار انتظامیہ اور گوانگ شی کی علاقائی حکومت نے کیا تھا۔

کانفرنس میں ماہرین، ماہرین تعلیم اور عالمی خریداروں نے بھی شرکت کی۔

کانفرنس کے دوران دستخط کردہ منصوبوں میں بانس اور لکڑی کے فرش، فرنیچر کی ذہین پیداوار ، خوشبو اور عطر کی ذہین پیداوار ، بائیوماس توانائی، جنگلات کاربن کی تخفیف اور جنگلات مالیات شامل ہیں۔

عالمی سطح پر جنگلات کے وسائل میں چین تیز رفتار ترقی کر تا ہوا سب سے بڑا شراکت دار بن چکا ہے۔

چین میں 2022 کے دوران جنگلات صنعت کی مجموعی پیداواری مالیت 90.7 کھرب یوآن تک پہنچ چکی تھی اور جنگلات مصنوعات کی درآمدات و برآمدات 190 ارب امریکی ڈالر سے زائد تھی جس سے یہ جنگلات مصنوعات کی پیداوار ، تجارت اور کھپت میں دنیا کا نمایاں ملک بن گیا۔