ابوظہبی(شِنہوا)چین کے نائب وزیراعظم ہو چھون ہوا نے کہا ہے کہ چین مشترکہ طور پر دوطرفہ عملی تعاون میں نئی پیش رفت کو فروغ دینے کی خاطر متحدہ عرب امارات(یو اے ای) کے ساتھ مل کر کام کرنے کیلئے تیار ہے۔

ہو چھون ہوا نے ان خیالات کا اظہار گزشتہ روز متحدہ عرب امارات کے دارالحکومت ابوظہبی میں اماراتی نائب وزیراعظم اور وزیر برائے صدارتی امور شیخ منصور بن زاید النہیان سے ملاقات کے دوران کیا۔

ہو چھون ہوا نے کمیونسٹ پارٹی آف چائنہ کی 20ویں قومی کانگریس کی عظیم کامیابیوں اور دور رس اہمیت بارے آگاہ کرنے سے قبل شیخ منصور بن زاید النیہان کو چینی صدر شی جن پھنگ کی جانب سے متحدہ عرب امارات کے صدر شیخ محمد بن زاید النہیان کو دلی مبارکباد پیش کرنے کو کہا۔

انہوں نے کہا کہ رواں سال کے آغاز کے بعد سے ہی صدر شی جن پھنگ اور صدر شیخ محمد بن زاید النہیان نے ایک دوسرے سے ملاقات اور فون پر بات چیت کے ذریعے دونوں ممالک کے درمیان ہمہ جہتی تعاون کو گہرا کرنے پر اتفاق رائے کیا۔

ہو چھون ہوا نے کہا کہ پہلی چین ۔ عرب ریاستوں کی سربراہی کانفرنس اور چین ۔ خلیج تعاون کونسل کی سربراہی کانفرنس کے کامیابی کیساتھ انعقاد کے نتیجہ خیز نتائج حاصل ہوئے ہیں۔

انہوں نے کہا کہ چین دونوں سربراہان مملکت کے درمیان طے پانے والے اتفاق رائے پر عمل کرنے کیلئے متحدہ عرب امارات کے ساتھ مل کر کام کرنے اور دوطرفہ تعلقات اور عملی تعاون میں نئی پیش رفت کیلئے کوشاں ہے۔

چینی نائب وزیراعظم نے کہا کہ چین متحدہ عرب امارات کے ساتھ سیاسی باہمی اعتماد کو مستحکم کرنے، ان کی ترقیاتی حکمت عملیوں کو ہم آہنگ کرنے، اعلیٰ معیار کے بیلٹ اینڈ روڈ تعاون کو آگے بڑھانے، روایتی توانائی کے تعاون کو مستحکم کرنے کے ساتھ ساتھ نئے اور قابل تجدید توانائی کے شعبوں میں تعاون کو وسعت دینے ، ہائی ٹیک تعاون میں نئی پیش رفت کو فروغ دینے اور نوول کرونا وائرس کی عالمی وباء کیخلاف جنگ میں تعاون کو مزید مضبوط بنانے کیلئے تیار ہے۔