بیجنگ (شِنہوا) چین کے آزادانہ تجارتی خطوں میں رواں سال کے ابتدائی 3 ماہ کے دوران غیر ملکی تجارت اور سرمایہ کاری میں تیزی سے اضافہ ہوا ہے۔

وزارت تجارت کی ترجمان شو جوئے ٹنگ نے ایک پریس کانفرنس میں بتایا کہ اس عرصے میں ملک کے 21 آزادانہ تجارتی خطوں میں مجموعی غیرملکی تجارت 18 کھرب یوآن (تقریباً 260.5 ارب امریکی ڈالرز) رہی جو گزشتہ برس کی نسبت 6.6 فیصد زائد ہے۔

شو نے بتایا کہ یہ شرح نمو قومی سطح سے 1.8 فیصد پوائنٹس زیادہ ہے۔

ترجمان نے بتایا کہ ان آزادانہ تجارتی خطوں میں براہ راست غیر ملکی سرمایہ کاری ایک سال قبل سے 22.1 فیصد بڑھ کر 71.9 ارب یوآن ہوگئی۔

شو نے کہا کہ ملک بھر میں آزادانہ تجارتی خطوں نے غیرملکی تجارت اور سرمایہ کاری کے فروغ میں کثیر الجہتی کوششیں کی ہیں جن میں ادارہ جاتی اختراع کی حوصلہ افزائی ، غالب صنعتوں کے ساتھ تعاون میں اضافہ ، خدمات بہتر کرنا اور لاجسٹکس کو رکاوٹوں سے آزاد کرنا شامل ہے۔

شو نے مزید بتایا کہ وزارت اندرون و بیرون ملک کاروباری اداروں کو چین کے آزادانہ تجارتی خطوں کی پالیسیوں بارے مزید جاننے اور مستقبل کی ترقی میں مدد کے لئے مختلف سرگرمیوں کا اہتمام کرے گی۔

چین نے پہلا آزادانہ تجارتی خطہ 2013 میں شنگھائی میں قائم کیا تھا۔