بیجنگ (شِنہوا) چین کے صدر شی جن پھنگ سے بدھ کو یہاں گیبون کے صدر علی بونگو اونڈیمبا نے ملاقات کی، جو چین کے سرکاری دورے پر ہیں۔

صدر بونگو کو چینی عوام کا "دیرینہ دوست" قرار دیتے ہوئے صدرشی نے کہا کہ صدر بونگو پہلے افریقی سربراہ مملکت ہیں جن کی وہ ایک بار بھر چینی صدر منتخب ہونے کے بعد میزبانی کر رہے ہیں، جو چین-گیبون تعلقات کی اہمیت اور اعلیٰ مقام کا اظہار ہے۔

چینی صدر نے کہا کہ حالیہ برسوں میں، صدر بونگو کی قیادت میں، گیبون اپنے قومی حالات کے مطابق ترقی کی راہ پر گامزن اور قومی استحکام اور اقتصادی تنوع کاسفر جاری رکھے ہوئے ہے اور اس نے قومی ترقی میں نمایاں کامیابیاں حاصل کی ہیں۔

صدرشی نے گیبون کی جانب سے علاقائی انضمام کے عمل کو فروغ دینے اور افریقہ میں ہاٹ اسپاٹ مسائل میں ثالثی  کے کردار کو سراہا۔

اس بات کا ذکر کرتے ہوئے کہ خطے اور اس سے باہر گیبون کا اثر و رسوخ نمایاں طور پر بڑھا ہے چینی صدر نے کہا کہ گیبون نے کامیاب ون فاریسٹ سمٹ کا انعقاد کیا اور کچھ عرصہ قبل وسطی افریقی ممالک کی اقتصادی برادری کے صدر کا عہدہ سنبھالا ہے۔

چینی صدر نے کہا کہ گیبون کے مخلص دوست کی حیثیت سے چین اس کی تمام کوششوں میں مزید ترقی اور ابھرتے ہوئے گیبون کے اسٹریٹجک اہداف کے جلد حصول کا خواہاں ہے۔

صدر شی نے چین اور گیبون کے سفارتی تعلقات کی 50 ویں سالگرہ کا ذکر کیا جو اگلے سال منائی جائے گی۔ شی نے کہا کہ پچھلی نصف صدی کے دوران، دونوں ممالک کے رہنماؤں کے عزم اور رہنمائی کی بدولت، چین-گیبون دوستی ہمیشہ کی طرح مستحکم رہی ہے۔