جوہانسبرگ (شِنہوا) چینی صدر شی جن پھنگ نے کہا ہے کہ چین برکس اور دیگر کثیر الجہتی پلیٹ فارمز پر ایران کے ساتھ تعاون مضبوط بنانے کے لئے  تیار ہے تاکہ مثبت اور مضبوط کثیر الجہتی کو فروغ دیا جاسکے۔

چینی صدر نے یہ بات 15 ویں برکس سربراہ اجلاس کے موقع پر ایرانی صدر ابراہیم رئیسی سے ملاقات میں کہی۔

انہوں نے ایران کو برکس کا رکن بننے پر مبارکباد دیتے ہوئے اس بات پر زور دیا کہ یہ ایک تاریخی واقعہ ہے کہ برکس سربراہ اجلاس نے تمام فریقوں کی مشترکہ کوششوں سے توسیع کا فیصلہ کیا ۔

چینی صدر  نے کہا کہ تمام نئے ارکان اہم اثر و رسوخ رکھنے والے ممالک ہیں۔انہوں نے اس اعتماد کا اظہار کیا کہ اس سے دنیا پر بڑے اثرات مرتب ہوں گے۔

انہوں نے کہا کہ رواں سال فروری میں ایرانی صدر کے کامیاب دورہ چین کے بعد سے دونوں ممالک کے اداروں نے دونوں رہنماؤں کے درمیان طے شدہ اتفاق رائے پر عملدرآمد کرنے میں وقت ضائع نہیں کیا جس کے مثبت نتائج حاصل ہوئے۔

ملاقات کے دوران ایرانی صدر نے کہا کہ ایران برکس کا مکمل رکن بننے میں چین کے تعاون کو انتہائی قدر کی نگاہ سے دیکھتا ہے اور اس کا شکر گزار ہے۔ اس سے ایران۔ چین تعلقات کے فروغ کو نئی رفتار ملے گی۔

انہوں نے کہا کہ یہ کثیر الجہتی پلیٹ فارمز دونوں ممالک کے درمیان تعاون مضبوط بنانے کے لئے سازگار ہے۔ چینی صدر  کی جانب سے تجویز کردہ گلوبل ڈیویلپمنٹ انیشی ایٹو، گلوبل سیکیورٹی انیشی ایٹو اور گلوبل سولائزیشن انیشی ایٹو کو بہتر طریقے سے آگے بڑھانے میں بھی مدد ملے گی۔

رئیسی نے ایران اور سعودی عرب کے درمیان مذاکرات اور مصالحت کے فروغ میں چینی صدر  کے اہم کردار پر شکریہ ادا کرتے ہوئے کہا کہ برکس کی توسیع سے ظاہر ہوتا ہے کہ یکطرفہ رویہ زوال پذیر ہے۔