ہیفے (شِںہوا) چین کے مشرقی صوبے انہوئی نے 3 سالہ لائحہ عمل جاری کیا ہے جس کا مقصد صوبے کو مصنوعی ذہانت (اے آئی) ٹیکنالوجی صنعت میں اختراع کے"اعلیٰ مقام" میں تبدیل کرنا ہے۔

صوبائی حکومت کے دفتراطلاعات میں منعقدہ پریس کانفرنس میں بتایا گیا کہ اس منصوبے میں ذہین کمپیوٹنگ پلیٹ فارمز کا قیام ، ڈیٹا وسائل میں کھلے پن کا فروغ ، بڑے ماڈلز کی تیاری ، زیادہ ایپلی کیشن منظرنامے متعارف کرانا ور مصنوعی ذہانت کے زیادہ سے زیادہ اداروں کو راغب کرنے پر توجہ مرکوز کی گئی ہے۔

منصوبے کے تحت 2025 تک انہوئی میں کل ذہین کمپیوٹنگ طاقت 14 ہزار پی (پیٹا) تک پہنچنے کی توقع ہے جبکہ تعلیم، صحت عامہ اور گاڑیوں سمیت اہم صنعتوں میں ڈیٹا کی سطح 500 ٹی بی تک پہنچ جائے گی۔

صوبائی محکمہ سائنس اور ٹیکنالوجی کے ایک عہدیدار وو جن سونگ نے بتایا کہ 2025 تک مجموعی طور پر 200 مصنوعی ذہانت پر مبنی ایپلی کیشن منظر نامے تشکیل دیئے جائیں گے اور سب سے پہلے نئے توانائی گاڑی جیسے 18 اہم شعبوں میں لاگو کئے جائیں گے۔

وو نے مزید کہا کہ فی الوقت  صوبے کی ذہین کمپیوٹنگ طاقت 5 ہزار پی ہے ۔ صرف گزشتہ برس صوبے میں مصنوعی ذہانت صنعت بارے 818 منصوبے شروع کئے گئے تھے جن میں مجموعی طور پر 600 ارب یوآن (تقریباً 83.6 ارب امریکی ڈالر) کی سرمایہ کاری ہوئی۔

انہوئی نے اپنی مصنوعی ذہانت صنعت کے لئے ایک سرمایہ کاری فنڈ بھی قائم کیا ہے جس کا ابتدائی سرمایہ 6 ارب یوآن ہے۔ اس کے آمدہ 5 سال میں 20 ارب یوآن تک پہنچنے کی توقع ہے۔ اس فنڈ کے قیام کا مقصد مصنوعی ذہانت منصوبوں کو درکار ضروری مالی تعاون فراہم کرنا ہے۔