بیجنگ(شِنہوا)چین کے صدر شی جن پھنگ نے کہا ہے کہ چین اور جرمنی ہمیشہ سے بات چیت، ترقی اور تعاون کے ساتھ ساتھ عالمی چیلنجز سے نمٹنے کے شراکت دار رہے ہیں۔ 

صدرشی نے ان خیالات کا اظہار جرمن صدر فرانک والٹر شٹائن مائر کے ساتھ فون پر گفتگو کرتے ہوئے کیا۔

چینی صدر نے کہا کہ دوطرفہ تعلقات کے حوالے سے رواں سال انتہائی اہمیت کا حامل ہے کیوںکہ  اس کے دوران  دونوں ممالک کے درمیان سفارتی تعلقات کی 50 ویں سالگرہ منائی جا رہی ہے۔ انہوں نے کہا کہ چین اور جرمنی کے گزشتہ  رہنماوں کی مشترکہ کوششوں کی بدولت دو طرفہ تعلقات میں پیش رفت  کی درست سمت برقرار رہی ہے اور دونوں ممالک تمام شعبوں میں سٹریٹجک شراکت دار بن چکے ہیں، انہوں نے مزید کہا کہ چین اور جرمنی کے تعلقات میں پیشرفت کو عوامی،وسیع مشترکہ مفادات اور بھرپور تجربہ سے بھرپور معاونت ملی ہے۔

صدر شی نے کہا کہ جب تک دونوں فریق باہمی احترام اور باہمی مفاد کو برقرار رکھیں گے، دوطرفہ تعلقات یقینی طور پر مستحکم اور دور تک آگے بڑھیں گے۔

چینی صدر نے کہا کہ ان کا ملک جرمنی کے ساتھ دوطرفہ تعلقات کو نئی بلندیوں تک لے جانے کے لیے کام کرنے کا خواہاں اور چین جرمنی تعلقات کے ایک اور کامیاب 50 سال کا آغاز کرے گا۔