بیجنگ (شِنہوا) چین کی وسط ایشیا کے 5 ممالک قازقستان، کرغزستان، تاجکستان، ترکمانستان اور ازبکستان ساتھ تجارتی نمو میں تیزی برقرار ہے۔
چین کے وزیر تجارت وانگ وین تاؤ نے 6 ممالک کے وزرائے معیشت و تجارت کے ویڈیو لنک اجلاس میں کہا کہ رواں سال کے ابتدائی 2 ماہ میں چین اور وسط ایشیا کے 5 ممالک کے درمیان تجارت میں گزشتہ برس کی نسبت 22 فیصد اضافہ ہوا ہے۔
وانگ کے مطابق گزشتہ برس چین اور 5 ممالک کے درمیان 70.2 ارب امریکی ڈالرز کی تجارت ہوئی جو تاریخ کی بلند ترین سطح ہے۔
2022 میں چین کی ان ممالک سے زراعت، توانائی اور معدنیات مصنوعات کی درآمدات میں 50 فیصد سے زائد اضافہ ہوا جبکہ مکینیکل اور الیکٹریکل مصنوعات کی برآمدات میں اضافے کی شرح 42 فیصد رہی۔
گزشتہ برس کے اختتام تک وسط ایشیا کے 5 ممالک میں چین کی براہ راست سرمایہ کاری کا حجم تقریباً 15 ارب ڈالرز تک پہنچ گیا تھا جس میں تیل و گیس کی تلاش، پروسیسنگ اور مینوفیکچرنگ، رابطوں اور ڈیجیٹل ٹیکنالوجیز جیسے شعبوں میں تعاون کے متعدد منصوبے پر کام کا آغاز ہوا۔
وانگ نے کہا کہ چین ، تجارت اور سرمایہ کاری کی نئی اشکال کے فروغ ، ترقی کے محرک کے طور پر اختراع کو آگے بڑھانے، خطے میں صنعتی و سپلائی چین کومحفوظ و مستحکم رکھنے، کثیر الجہتی تجارتی نظام کو برقراررکھنے اور بین العلاقائی سرحدی تجارت کو ترقی کا نیا انجن بنانے کے لئے تمام فریقوں کے ساتھ ملکر کام کرنے کا خواہش مند ہے۔
وسط ایشیا کے 5 ممالک کے وزراء نے تجارت و سرمایہ کاری، ڈیجیٹل معیشت، ماحول دوست ترقی اور ٹرانزٹ نقل و حمل میں تعاون مستحکم کرنے کے لئے چین کا ساتھ دینے پر آمادگی ظاہر کی۔
اجلاس کے دوران 6 ممالک کے وزراء نے اس بات پر اتفاق کیا کہ چین۔ وسط ایشیا کانفرنس کے کچھ تنائج کی دستاویز پر دستخط کئے جائیں گے اور چینی صارفین کو وسط ایشیا کی مصنوعات متعارف کرانے کے لیے ای کامرس مہم شروع کی جائے گی۔
