بیجنگ (شِنہوا) چین کے صدر اور کمیونسٹ پارٹی آف چائنہ کی مرکزی کمیٹی کے جنرل سیکرٹری شی جن پھنگ نے کہا کہ چین اپنی ہمسائیگی کی پالیسی میں تسلسل اوراستحکام برقرار رکھے گا، چینی جدیدیت سے اپنے ہمسایہ ممالک کو مزید فوائد پہنچائے گا اور مشترکہ طور پر ایشیا میں جدیدیت کا عمل آگے بڑھائے گا۔
یہ بات انہوں نے ویتنام کے دورے سے قبل ویتنام کے اخبار نہان دان میں منگل کوشائع اپنے ایک مضمون میں کہی جس کا عنوان ہے "مشترکہ مستقبل کے ساتھ ایسی چین۔ ویتنام کمیونٹی کی تعمیر جو اسٹریٹجک اہمیت کی حامل ہو اور ہماری جدیدیت کی مہم میں ایک نیا باب رقم کرے"۔
انہوں نے کہا کہ چین اپنے ہمسایوں کے ساتھ دوستی اور شراکت داری کے فروغ اور ایک خوشگوار، محفوظ اور خوشحال ہمسائیگی کے رہنما اصولوں پر کاربند رہے گا۔ اس کے ساتھ ساتھ ملک ہم آہنگی، خلوص، باہمی فائدے اور جامع پن کے اصولوں میں ایک نئی روح شامل کرنے کی کوشش کرے گا۔
چینی صدر شی جن پھنگ نے کہا کہ چینی جدیدیت سے چین اپنے ہمسایوں کو مزید فوائد پہنچائے گا، مشترکہ طور پر ایشیا میں جدیدیت کا عمل آگے بڑھائے گا اور ویتنام و دیگر ایشیائی ممالک کو ترقی کے نئے مواقع مہیا کرے گا۔
انہوں نے کہا کہ اسٹریٹجک اہمیت کے مشترکہ مستقبل کی حامل چین ویتنام کمیونٹی زیادہ سے زیادہ ممالک کو مشترکہ مستقبل کے ساتھ ایشیائی برادری کے قیام کے عظیم مقصد کی سمت راغب کرے گی۔ اس سے ایشیا میں طویل مدتی ترقی اور اچھے ہمسایوں کے لئے ہماری کوششوں کو مزید مثبت توانائی ملے گی اور دنیا میں امن و ترقی کو زیادہ سے زیادہ فروغ ملے گا۔
