ارمچی(شِنہوا)چین کے شمال مغربی خودمختار ویغورخطے سنکیانگ کے دارالحکومت ارمچی کی انتظامیہ نے ضرورت مند شہریوں کو نوول کرونا وائرس کے اثرات پر قابو پانے میں مدد فراہم کرنے کیلئے خصوصی پالیسیاں مرتب کر لی ہیں۔

شہری حکومت کے ڈپٹی سیکرٹری جنرل لی یان می نے منگل کے روز بتایا کہ ارمچی نے مشکلات سے دوچار افراد کے بنیادی روزگار زندگی کو یقینی بنانے کیلئے پالیسیاں مرتب کی ہیں۔

لی یان می نے بتایا کہ بے روزگار یا کم آمدنی والے لوگوں کو وظیفہ فراہم کیا جائے گا، اور شہر کی پبلک رینٹل ہاؤسنگ سکیم کے تحت خاندانوں کو 5 ماہ کیلئے کرائے سے استثنیٰ دیا جائے گا۔

لی یان می کے مطابق ملازمت کے سلسلے میں مشکلات کے شکار کم آمدن والے گروہوں کو پبلک سروس کے شعبے میں متعدد نوکریاں فراہم کی جائینگی۔

ارمچی میں وبائی صورتحال میں بہتری آنے کے ساتھ ساتھ کم خطرے والے علاقوں میں زندگی معمول پر آ رہی ہے۔ سپر مارکیٹوں، دواخانوں اور ریستورانوں سمیت ضروری کاروباری سرگرمیاں دوبارہ شروع کی جا رہی ہیں۔