بیجنگ(شِنہوا)چین نے دیہی تارکین وطن مزدوروں کے ساتھ ساتھ حال ہی میں غربت سے باہر نکلنے والے دیہی باشندوں کے روزگار اور کاروبار کے امکانات کو تقویت دینے کیلئے ایک گائیڈ لائن جاری کر دی ہے۔

وزارت انسانی وسائل و سماجی ترقی اور قومی ترقی و اصلاحات کمیشن سمیت 5 ریاستی اداروں کی طرف سے جمعہ کے روز جاری کردہ گائیڈ لائن کے مطابق ملک اس سلسلے میں تارکین وطن کارکنوں کیلئے سوشل انشورنس پریمیم کی ادائیگیوں کو موخر کرنے اور سوشل انشورنس سبسڈی فراہم کرنے جیسے معاون اقدامات کے مکمل نفاذ کو یقینی بنائے گا۔

گائیڈلائن میں کہا گیا ہے کہ اس طرح کی مدد سے تعمیرات، مینوفیکچرنگ اور سروس انڈسٹریز سمیت ایسی صنعتوں کو ترجیح دی جائے گی جو تارکین وطن کارکنوں کی بڑی وصول کنندگان ہیں۔

گائیڈ لائن میں تارکین وطن کارکنوں کو ان کے گھروں کے قریب ملازمتیں تلاش کرنے کی ترغیب دیتے ہوئے یہ بھی کہا گیا ہے کہ ملک مقامی خصوصیات کے ساتھ دیہی شعبوں کی ترقی کو تیز کرے گا اور ورک ریلیف پروگراموں کو فروغ دے گا۔

گائیڈ لائن میں غربت سے نکالے گئے دیہی باشندوں کی روزگار کی نگرانی کو مضبوط بنانے، پالیسی کو غربت سے نجات کی خاطر نقل مکانی کرنے والوں کی طرف جھکانے اور دیہی ملازمت کے متلاشی افراد کیلئے غیر ضروری پابندیوں کو ختم کرنے کی کوششوں پر بھی زور دیا گیا ہے۔