کن منگ (شِنہوا) چین کے جنوب مغربی صوبہ یون نان میں رواں سال موسم بہار کی تعطیلات کے دوران سیاحوں کے 4 کروڑ 51 لاکھ 50 ہزار دورے ہوئے جو گزشتہ برس کی نسبت 244.7 فیصد زیادہ ہے۔

جمعہ کو ختم ہونے والی 7 روزہ تعطیلات کے دوران سیاحت سے ہونے والی آمدن 38.44 ارب یوآن (تقریباً 5.68 ارب امریکی ڈالرز) تک پہنچ گئی، جو گزشتہ برس کی نسبت 249.4 فیصد زیادہ ہے۔

صوبائی محکمہ ثقافت و سیاحت کے اعداد و شمار کے مطابق تعطیلات کے دوران یون نان میں باہر سے آنے والے سیاحوں کی تعداد 2 کروڑ 5 لاکھ 80ہزار  رہی جو کل تعداد کے 45.59 فیصد کے مساوی اور گزشتہ برس کی نسبت تقریباً 22 فیصد پوائنٹس کا اضافہ ہے۔

صوبے کے 16 پریفیکچرز اور شہروں میں آنے والے سیاحوں کی تعداد میں دوہرے ہندسے میں اضافہ برقرار رہا ۔ ان میں دی ہونگ دائی اور جنگ پو خوداختیار پریفیکچر، شی شوانگ بانا دائی خوداختیارپریفیکچر، باؤشان شہر اور دیگر سرحدی پریفیکچر اور شہروں میں مکمل بحالی جاری ہے۔