نانجنگ(شِنہوا) چین کے مشرقی صوبے جیانگ سوکی صوبائی حکومت کے مطابق، حالیہ برسوں میں چین-یورپ مال بردار ٹرین کے دوروں کی تعداد میں تیزی سے اضافہ ہوا ہے، جس سے بین الاقوامی سپلائی چین کو مستحکم کرنے میں مدد ملی ہے۔

جیانگ سو کے شہر لیان یون گانگ میں  چین-یورپ ریلوے ایکسپریس تعاون فورم کے موقع پر ایک پریس کانفرنس میں بتایا گیا کہ  2016 سے 2021 تک چین یورپ مال بردار ٹرینوں  کے دوروں کی تعداد میں سالانہ 55 فیصد اور مال برداری کے حجم میں نو گنااضافہ ہوا۔

رواں سال اکتوبر کے آخر تک، اب تک کھلنے والے  چین-یورپ مال بردار ٹرین کے روٹس کی تعداد 82 تک پہنچ گئی تھی  جو 24 یورپی ممالک کے 204 شہروں تک پہنچ  رہے ہیں۔ ان روٹس پر  مال بردار ٹرینوں کے دوروں کی تعداد 62ہزار رہی،جن کے ذریعے 57 لاکھ 60ہزار20 فٹ مساوی یونٹس( ٹی ای یوز)سامان کی آمدورفت ہوئی۔

اس وقت نانجنگ اور لیان یون گانگ سمیت جیانگ سو کے پانچ شہروں سے23 روٹ  یورپ، وسطی ایشیا اور جنوب مشرقی ایشیا کے تقریباً 80 شہروں تک پہنچ رہے ہیں۔ اس سال جنوری سے نومبر تک، جیانگ سو اور یورپ کے درمیان مال بردار ٹرینوں کے دوروں کی تعداد 1ہزار800 تک پہنچ گئی، جو گزشتہ سال کے مقابلے میں 12 فیصد زیادہ ہے۔