بیجنگ (شِنہوا) چین میں جہاز سازی صنعت نے رواں سال کے ابتدائی 8 ماہ کے دوران پیداوار اور نئے آرڈرز دونوں میں دو ہندسوں میں اضافہ ریکارڈ کیا ہے جس کے سبب عالمی سطح پر اس کی سبقت برقرار رہی۔

چائنہ ایسوسی ایشن آف دی نیشنل شپ بلڈنگ انڈسٹری کے مطابق اس عرصے میں ملک کی جہاز سازی کی پیداوار 2 کروڑ 79 لاکھ 80 ہزار ڈیڈ ویٹ ٹن (ڈی ڈبلیو ٹی) تک پہنچ گئی جو گزشتہ برس کی نسبت 16.9 فیصد زائد ہے۔

ایسوسی ایشن نے بتایا کہ چین کے جہاز سازی شعبے میں نئے آرڈرز میں گزشتہ برس سے 86.5 فیصد اضافہ ہوا اور یہ مجموعی طور پر 5 کروڑ 23 لاکھ 10 ہزار ڈی ڈبلیو ٹی رہے۔

اعداد و شمار کے مطابق یہ مجموعی عالمی پیداوار کا 49 فیصد جبکہ نئے آرڈرز کا 68.8 فیصد ہے۔

چین میں 2023 کے ابتدائی 8 ماہ کے دوران بحری جہازوں کی برآمدات نے مستحکم شرح نمو برقرار رکھی اور اس کی برآمدی مالیت گزشتہ برس کی نسبت 20.2 فیصد اضافے کے ساتھ 16.18 ارب امریکی ڈالر رہی۔