کن منگ (شِنہوا) 8 ویں چین ۔ جنوبی ایشیا نمائش ختم ہوگئی جس میں مجموعی طور پر 8 ارب یوآن (تقریباً 1.12 ارب  ڈالر) مالیت کے ملکی اور غیر ملکی تجارتی معاہدوں پر دستخط ہوئے۔

منتظمین کے مطابق چین کے جنوب مغربی صوبے یون نان کے صدرمقام کن منگ میں منعقدہ اس نمائش میں آن لائن اور آف لائن فروخت 50 کروڑ یوآن سے زائد رہی۔

نمائش 6 روز جاری رہی جس میں فن تعمیرات کی ٹیکنالوجی ، پیداوار ، ماحول دوست توانائی اور جدید زراعت سمیت دیگر موضوعات پر 15 نمائشی ہالز قائم کئے گئے تھے۔

رواں سال کی نمائش میں 82 ممالک ، خطوں اور عالمی تنظیموں نے شرکت کی نمائش کنندگان میں 2 ہزار سے زائد کمپنیاں شامل تھیں۔ ان میں سے تقریباََ نصف غیر ملکی کمپنیاں تھیں جن کا تعلق جنوبی ایشیا اور جنوب مشرقی ایشیا کے تمام ممالک سے تھا۔

کن منگ میں اس نمائش کا پہلی بار انعقاد 2013 میں کیا گیا تھا۔ اسی سال چین نے بیلٹ اینڈ روڈ انیشی ایٹو آگے بڑھایا تھا۔ نمائش نے اپنے آغاز سے اب تک 18 ہزارسے زائد ملکی و غیرملکی کمپنیوں کو خدمات مہیا کی، 100 ارب امریکی ڈالر سے زائد کی تجارت کو فروغ دیا اور 3 ہزار سے زائد منصوبوں پر دستخط کے لئے سہولت فراہم کی۔

نمائش کا انعقاد وزارت تجارت اور یون نان صوبائی حکومت نے مشترکہ طور پر کیا  جوچین اور جنوبی ایشیا کے ممالک کے درمیان اقتصادی و تجارتی تبادلوں میں سال کی اہم ترین تقریبات میں ایک بن چکی ہے۔

سرکاری اعداد و شمار کے مطابق 2023 میں چین اور جنوبی ایشیائی ممالک کے درمیان تقریباََ 200 ارب امریکی ڈالر کی تجارت ہوئی جو 2013 کی نسبت دوگنی ہے۔