بیجنگ (شِنہوا) چین میں رواں سال کے ابتدائی9 ماہ کے دوران نئے کاروبار کے اندراج میں اضافے کا سلسلسہ جاری رہا جو سازگار حکومتی پالیسیوں پر مارکیٹ کے اعتماد کو ظاہر کرتا ہے۔

ریاستی انتظامیہ برائے مارکیٹ نظم ونسق کے جاری کردہ اعدادوشمار کے مطابق جنوری سے ستمبر کے دوران تقریباً 2 کروڑ 48 لاکھ 10 ہزار نئے کاروباری ادارے قائم ہوئے جو گزشتہ برس کے مقابلے میں 12.7 فیصد زائد ہے۔

اس مجموعہ میں نئی کمپنیوں کی تعداد میں 15.4 فیصد اضا فہ ہوا جبکہ خود روزگار گھرانوں کی تعداد 11.7 فیصد بڑھی۔

غیرملکی مالی تعاون سے قائم کاروباری اداروں کی تعداد میں ایک برس قبل کے مقابلے 29.3 فیصد اور نجی کمپنیوں کی تعداد میں 15.3 فیصد اضافہ ہوا۔

ریاستی انتظامیہ برائے مارکیٹ نظم ونسق نے کہا ہے کہ یہ اعداد و شمار مارکیٹ کی توقعات میں بہتری اور اعتماد کی بحالی کی سمت اشارہ کرتے ہیں۔ ادارے نے اس بات پر بھی زور دیا ہے کہ چینی مارکیٹ سرمایہ کاری کی ایک مقبول منزل بنی ہوئی ہے۔

کاروباری اندراج میں خاطر خواہ اضافہ ہر شعبے میں ہوا جس میں روایتی زراعت سے لیکر جدید خدمات شامل ہیں ۔ رہائش اور کھانے پینے کے کاروبار کے اندراج میں 40 فیصد سے زائد اضافہ ہوا ۔ یہ شعبے نوول کرونا وائرس وبا سے سب سے زیادہ متاثر ہوئے تھے۔

ریاستی انتظامیہ برائے مارکیٹ نظم ونسق نے کہا کہ مقامی طلب بڑھانے ، اعتماد کے فروغ اور نجی معیشت میں تعاون کی متعدد پالیسیوں کے سبب چینی کاروباری اداروں نے زیادہ مضبوط ترقی کی رفتار حاصل ۔ ریاستی انتظامیہ برائے مارکیٹ نظم ونسق  نے منصفانہ اور منظم کاروباری ماحول پیدا کرنے کی مزید کوششوں کا عہد بھی کیا ہے۔

ستمبر کے اختتام تک ملک بھر میں رجسٹرڈ کاروباری اداروں کی تعداد 18 کروڑ 10 لاکھ ہوچکی تھی جو 2022 کے اختتام کے مقابلے میں 6.7 فیصد زائد ہے۔