ہانگ ژو(شِنہوا) چین میں ایک سابق قومی سیاسی مشیرشین ڈیونگ پر رشوت خوری کے الزام  میں جمعرات کو چین کےمشرقی صوبے ژی جیانگ میں ننگبو کی انٹرمیڈیٹ پیپلز کورٹ میں مقدمہ چلایا گیا۔

استغاثہ کے مطابق شین ڈیونگ جو چینی عوامی سیاسی مشاورتی کانفرنس کی 13ویں قومی کمیٹی کی قائمہ کمیٹی کے رکن اور سی پی پی سی سی قومی کمیٹی کی سماجی اور قانونی امور کی کمیٹی کے سربراہ  رہ چکے ہیں، پر ذاتی طور پر اور اپنے رشتہ داروں کے ذریعے 6 کروڑ 45 لاکھ 60 ہزار یوآن (تقریباً 93 کروڑ40 لاکھ ڈالر) مالیت کی رقم اور قیمتی اشیاء وصول کرنے کا الزام عائد کیا گیا ہے۔

 انہوں نے مبینہ طور پر مختلف عہدوں پر رہتے ہوئے 1995 سے 2022 کے درمیان قانونی چارہ جوئی، تعمیراتی منصوبوں کے ٹھیکے اور ذاتی ترقی سے متعلق معاملات میں افراد اور تنظیموں کی مدد کرنے کے لیے مبینہ طور پر اپنے عہدے کا فائدہ اٹھایا۔

ایک عدالتی بیان میں کہا گیا ہے کہ استغاثہ، مدعا علیہ اور  ملزم کے وکلاء نے شواہد کی بنیاد پر جرح کی اور دلائل دیئے۔

 اپنے آخری بیان میں شین نے اعتراف جرم کیا اور پشیمانی کا اظہار کیا۔

اس مقدمے کی سماعت میں قانون سازوں، سیاسی مشیروں، میڈیا اور عوام کے نمائندوں سمیت 30 سے زائد افراد نے شرکت کی۔

فیصلہ مقدمے کی سماعت کی تکمیل کے بعد سنایا جائے گا۔