بیجنگ (شِنہوا) چینی حکام نے آگ لگنے کے بڑے خطرات میں کمی کے لئے تفصیلی حفاظتی معائنے کا حکم دیا ہے۔

نیشنل فائر اینڈ ریسکیو ایڈمنسٹریشن نے ایک ویڈیو کانفرنس میں بتایا کہ آگ بجھانے کے مقامی محکموں کو فوری طور پر حفاظتی معائنے کرنا چاہئے اور اس میں اسپتالوں، محنت کش اداروں ، فیکٹریوں اور گوداموں میں حفاظتی خطرات دور کرنے پر خصوصی توجہ دی جائے۔

انتظامیہ کے مطابق غیر قانونی سب لیزنگ، آگ بجھانے کی سہولیات کی ناقص دیکھ بھال ، آتش گیر یا دھماکہ خیز مواد کے زائد ذخیرے سمیت دیگر حفاظتی خطرات کے خلاف کارروائیاں تیز کی جائیں۔

انتظامیہ کے مطابق رواں سال کے آغاز سے 18 اپریل تک ملک بھر میں آتشزدگی کے مجموعی طور پر 3 لاکھ 96 ہزار واقعات ہوئے جس میں 639 افراد ہلاک ہوئے اور 2.21 ارب یوآن (32 کروڑ 3 لاکھ 50 ہزار امریکی ڈالرز) مالیت کی املاک کو براہ راست نقصان پہنچا۔