بیجنگ (شِنہوا) چائنہ امپورٹ اینڈ ایکسپورٹ میلے کے 133 ویں ایڈیشن میں 220 سے زائد ممالک اور خطوں کے خریدارشرکت کریں گے،15 اپریل سے 5 مئی تک چین کے جنوبی شہر  گوانگ ژو میں میلے کے دوران تمام آف لائن نمائشیں بحال کی جائیں گی۔

نائب وزیر تجارت وانگ شووین نے ایک پریس کانفرنس میں کہا کہ  کینٹن فیئر کے نام سے معروف  یہ تجارتی میلہ چین اور عالمی معیشت کی بحالی اور ترقی کے لیے انتہائی اہمیت کا حامل ہو گا کیونکہ یہ دنیا بھر کی کمپنیوں کو چینی شراکت داروں کے ساتھ محفوظ، قابل بھروسہ اور موثر سپلائی چین تشکیل دینے کا مواقع فراہم کرتا ہے۔

وانگ نے بتایا کہ آف لائن نمائشوں کے لیے 15لاکھ  مربع میٹر پر درآمدات اور برآمدات کے لیے بوتھ  قائم ہوں گے۔ تقریباً 34ہزار ملکی فرمیں برآمدی حصے میں اپنے بوتھ لگائیں گی، جن میں سے 5ہزار 700 معروف برانڈز یا ٹیکنالوجیز کی حامل ہیں۔  درآمدی حصے میں 40 ممالک کی 508 غیرملکی کمپنیاں شامل ہوں گی، جن میں امریکہ، کینیڈا، اٹلی، جرمنی اور اسپین شامل ہیں۔ 

چین نے  میلےکے عالمی شرکاء کے لیے داخلے کی سہولت کے لیے متعدد اقدامات کیے ہیں۔ وزارت خارجہ کے ایک عہدیدار وو شی نے کہا کہ دنیا بھر میں چینی سفارت خانوں اور قونصل خانوں نے ویزا درخواستوں پر کارروائی کے لیے اضافی گھنٹے اور افرادی قوت مختص کی ہے، چین کی جانب سے کوویڈ سے پہلے کی ویزا پالیسیاں دوبارہ شروع کرنے کے بعد ویزا درخواستوں کی تعداد میں اضافہ ہورہا ہے۔