جیو چھوان (شِنہوا) چائنہ مینڈ اسپیس ایجنسی نے اعلان کیا ہے کہ شین ژو 16 عملہ بردار خلائی جہاز چین کے شمال مغربی جیو چھوان سیٹلائٹ لانچ مرکز سے منگل (بیجنگ وقت کے مطابق) صبح 9 بجکر 31 منٹ پر لانچ کیا جائے گا۔

چائنہ مینڈ اسپیس ایجنسی کے ڈپٹی ڈائریکٹر لین شی چھیانگ نے پیر کے روز ایک پریس کانفرنس میں بتایا کہ یہ خلائی جہاز 3 خلابازوں جنگ ہائی پھنگ، ژو یانگ ژو اور گوئی ہائی چھاؤ کو لیکر جائے گا جو شین ژو-16 خلائی پرواز مشن کو انجام دیں گے۔ جنگ اس مشن کی قیادت کریں گے۔

شین ژو-16 رواں سال چین کے انسان بردار خلائی پروگرام کی دوسری پرواز اور چین کے خلائی اسٹیشن کے اطلاق اور ترقیاتی مرحلے میں داخل ہونے کے بعد پہلا عملہ بردار مشن ہے۔

عملہ تقریباً5 ماہ مدار میں رہے گا۔

انہوں نے کہا کہ لانچ میں لانگ مارچ -2 ایف کیریئر راکٹ استعمال ہوگا جس میں پروپیلنٹ جلد بھردیا جائے گا۔