ووہان (شِنہوا) چین نایاب مچھلیوں کے تحفظ کی کوششوں کے سلسلے میں ملک کے طویل ترین دریا یانگسی میں 2 لاکھ چینی اسٹرجن چھوڑ ے گا۔

چائنہ تھری گورجزکارپوریشن نے کہا ہے کہ ایک لاکھ مچھلیوں کی پہلی کھیپ ہفتے کو صوبہ ہوبے کے شہریی چھانگ میں چھوڑی گئی تھی اور اس کے بعد مزید دو کھیپ چھوڑی جائیں گی۔

یہ مچھلی 14 کروڑ برس پرانی ہے، چینی اسٹرجن زمین پر ریڑھ کی ہڈی کی سب سے قدیم اقسام میں سے ایک ہے اور چین میں اسے کلاس۔اے تحفظ کا درجہ حاصل ہے۔ مچھلی کو بنیادی طور پر مصنوعی افزائش نسل کے ذریعے محفوظ کیا جاتا ہے جس کے بعد قدرتی ماحول میں چھوڑ دیا جاتا ہے۔

کمپنی کے تحقیقی مرکز برائے انواع کے چیف انجینئر جیانگ وائی نے کہا کہ رواں سال چھوڑی گئی اسٹرجن کی عمر 6 ماہ سے 14 برس کے درمیان ہے جس کا مقصد جنگلی آبادی میں اضافہ ہے۔

چھوڑے جانے سے قبل جنسی پختگی کے قریب بڑے اسٹرجن کو سیٹلائٹ ٹریسرز کی مدد سے جانچا گیا تھا تاکہ جنگلی جانوروں میں نسل کی بقا پر ماحولیاتی اثرات کا تجزیہ کیا جاسکےاور مستقبل کے حفاظتی اقدامات سے آگاہی ہوسکے۔

چین نے حالیہ برسوں میں دریائے یانگسی کے ساتھ ماحولیاتی تحفظ کے لئے ٹھوس کوششیں کی ہیں، 2021 کے آغاز میں دریا کے ساتھ اہم پانیوں میں ماہی گیری پر 10 برس کی پابندی عائد کی گئی ہے۔

چین نے دسمبر 2020 میں دریائے یانگسی کے تحفظ کا قانون نافذ کیا تھا جس نے دریا میں حیاتیاتی تنوع کے تحفظ کے لئے قانونی ضمانت مہیا کی ۔