ہیفے (شِنہوا) چین کے مشرقی صوبے انہوئی کے دارالحکومت ہیفے میں ووکس ویگن انہوئی کے ایم ای بی پلانٹ میں کاروباری سرگرمیاں عروج پر ہیں کیونکہ ایک ہزار سے زائد روبوٹس نئی توانائی گاڑیوں (این ای وی) کی تیاری میں مصروف ہیں۔ پروڈکشن پلانٹ کے ساتھ  2 سپلائر پارک قائم کئےگئے ہیں جن میں 18 شراکت دار منتقل ہورہے ہیں۔

صرف ڈھائی برس کے دوران ووکس ویگن نے ہیفے میں ایک نیا مرکز تعمیر کیا ہے ، جس میں تحقیق و ترقی سے لیکر نئی توانائی گاڑیوں کی پیداوار ، فروخت اور خدمات تک مکمل ویلیو چین کا احاطہ کیا گیا ہے۔

ووکس ویگن انہوئی کے سی ای او ارون گابارڈی نے کہا کہ وہ خاص طور پر نئی ٹیکنالوجیز اور انہوئی کے شاندار انفراسٹرکچر کو استعمال کررہے ہیں۔ ہم بھی اس اختراعی طاقت سے فائدہ اٹھائیں گے۔

ووکس ویگن ان عالمی کمپنیوں میں شامل ہے جو چین کی ابھرتی صنعتوں میں مسلسل سرمایہ کاری میں اضافہ کررہی ہیں۔

چین تکنیکی اختراع کے ساتھ صنعتی اختراع کو بھی فروغ دے رہا ہے۔  زیادہ اعلیٰ معیار ، اعلیٰ درجے اور تکنیکی طور پر جدید صنعتیں غیر ملکی سرمایہ کاری کے لئے پرکشش مقام بن رہی ہیں۔

وزارت تجارت کے اعداد و شمار کے مطابق پیداواری شعبے میں غیر ملکی سرمایہ کاری کا حقیقی استعمال گزشتہ برس کی نسبت 1.9 فیصد بڑھ کر 2023 کے ابتدائی 10 ماہ کے دوران 283.44 ارب یوآن (تقریبا 39.84 ارب امریکی ڈالر) تک پہنچ چکا ہے جس میں اعلیٰ ٹیکنالوجی مینوفیکچرنگ میں 9.5 فیصد کا اضافہ ہوا۔

ڈیلوئٹ ہیفے برانچ کے ڈپٹی جنرل منیجر وانگ یاپھنگ نے کہاکہ انہوئی اس کی ایک مثال ہے یہاں غیر ملکی کاروباری اداروں نے صنعتوں میں سرمایہ کاری کو وسعت دینے کی یقینی خواہش کا اظہار کیا ہے جن میں اعلیٰ درجے کے سازوسامان کی پیداوار ، نئی توانائی اور دیگر متعلقہ شعبے شامل ہیں۔

وانگ نے مزید کہا کہ کمپنی کے ایک مارکیٹ سروے میں یہ بات سامنےآئی ہے کہ چین کی صارف مارکیٹ کو اپ گریڈ کرنے اور سائنس و ٹیکنالوجی اختراع میں اضافے نے غیرملکی کاروباری اداروں کی چین میں نئے کاروبار کی تلاش کی خواہش بڑھادی ہے۔