شنگھائی(شِنہوا)چھٹی چائنہ انٹرنیشنل امپورٹ ایکسپو(سی آئی آئی ای) میں مزید نئے غیر ملکی کاروباری ادارے چینی منڈی سے استفادہ کرنے کے لیے شرکت کریں گے جواس سال 5 سے 10 نومبر تک شنگھائی میں منعقد ہوگی۔

سی آئی آئی ای بیورو کے مطابق  فارچون 500 میں شامل تقریباً 20 کمپنیاں،معروف صنعتی کمپنیاں، اور  چھوٹے اور درمیانے درجے کے 500 سے زیادہ اداروں نے پہلی بار بڑی امپورٹ ایکسپو میں شرکت کے لیے اندراج کرایا ہے۔

پہلی بار شرکت کرنے والوں میں جاپانی لائف سٹائل کا برانڈ موجی بھی شامل ہے۔موجی(شنگھائی) کمپنی لمیٹڈ کے بورڈ کے چیئرمین اور منیجنگ ڈائریکٹر شمیزو ساتوشی نے کہا کہ سی آئی آئی ای میں پہلی بار شمولیت کے ساتھ کمپنی کو امید ہے کہ وہ چینی مارکیٹ میں اپنا کاروبار پھیلانے کے لیے اپنے غیر متزلزل عزم کا مظاہرہ کرے گی۔

1 ارب 40 کروڑ  کی آبادی والے ملک میں صارفین کی بڑھتی ہوئی قوت خرید سے متوجہ ہو کر تقریباً 200 کاروباری ادارے مسلسل چھ سالوں سے اس تقریب میں شرکت  کر رہے ہیں جس سے دنیا کی دوسری بڑی معیشت پر ان کا اعتمادظاہر ہوتا ہے۔

کاروباری نمائش کے لیے اب تک3 لاکھ 60 ہزارمربع میٹر سے زیادہ رقبہ بک کیا جا چکا ہےجس میں کاروباری ادارے اپنی جدید ترین مصنوعات اور خدمات کی نمائش کے لیے تیار ہیں۔ گزشتہ پانچ سیشنز میں تقریباً 2 ہزار نئی مصنوعات، ٹیکنالوجیز اور خدمات پہلی بار متعارف کرائی گئی ہیں۔

خوراک اور زرعی مصنوعات، آٹوموبائل، ذہین صنعت اور انفارمیشن ٹیکنالوجی، اشیائے صرف، طبی آلات اور صحت کی دیکھ بھال کی مصنوعات اور خدمات کی تجارت کے لیے کاروباری نمائش کے چھ حصے ہوں گے۔

منتظم کے مطابق چالیس کاروباری اداروں نے اگلے سال 7ویں سی آئی آئی ای میں شرکت کے لیے اندراج کرایا ہے  جس میں کاروباری نمائش کے لیے اب تک 30 ہزار مربع میٹر سے زیادہ رقبہ  بک کیا جا چکا ہے۔