شینزین (شِنہوا) چین کے شمالی اندرونی منگولیا خود مختار میں ہوا سے سالانہ 10 ارب کلو واٹ گھنٹے (کے ڈبلیو ایچ) بجلی پیدا کرنے  کی صلاحیت کے حامل بجلی گھر کو مکمل پیداواری صلاحیت سے فعال کرکے  گرڈ سے منسلک کیا گیا ہے جو ملک کا سب سے بڑا ونڈ پاور بیس ہے۔

چین کے معروف نیوکلیئر پاور آپریٹر چائنہ جنرل نیوکلیئر پاور کارپوریشن (سی جی این) کا یہ  ونڈ پاور پراجیکٹ اندرونی منگولیا کی ہنگ گان لیگ میں تعمیر کیا گیا جو  صحرائی علاقوں کے لیے  بڑے پیمانے پر ہوا اور شمسی بجلی گھروں کی ملک کی پہلی کھیپ میں سے ایک ہے۔

چین کے جنوبی صوبہ گوانگ ڈونگ کے شہر شینزین میں واقع کمپنی کے مطابق پلانٹ سے پیدا ہونے والی بجلی ماحول دوست ہے اور یہ  کوئلے کی کھپت کو تقریباً 29 لاکھ 60 ہزار ٹن کم کرنے اور تقریباً 80 لاکھ20 ہزار ٹن کاربن ڈائی آکسائیڈ کے اخراج کو روکنے میں مدد دے گی۔

سی جی این نیو انرجی ہولڈنگز کمپنی لمیٹڈ کے بورڈ کے چیئرمین ژانگ ژی وو نے کہاکہ اس ونڈ پاور بیس کی بدولت چین میں سی جی این کی توانائی سے بجلی پیدا کرنے کے نئے منصوبوں کی نصب صلاحیت اس سال کے آخر تک 4 کروڑ 50 لاکھ کلو واٹ تک پہنچنے کی توقع ہے۔