بیجنگ (شِنہوا) چین کی اعلیٰ مقننہ نیشنل پیپلز کانگریس (این پی سی) نے چین  کے بغیر پائلٹ غیر عسکری ہوائی جہاز کے امریکی فضائی حدود میں غیر ارادی طور پر داخلے کے بعد چین کے خطرے کو بڑھا چڑھا کر پیش کرنے، چین کو بدنام اور رسوا کرنے والی قراردادوں کی منظوری د ینے کے حوالے سے امریکی سینیٹ کی مذمت کی ہے۔

نیشنل پیپلز کانگریس کی خارجہ امور کمیٹی نے ایک بیان میں کہا ہے کہ امریکی  سینیٹ نے ایوان نمائندگان کی پیروی کرتے ہوئے ا ئیر شپ پر قراردادیں منظور کیں۔

 بیان میں اس کو  امریکہ  کی ایک مزید غلطی قرار دیا گیا ہے جو کہ  اس نے حقائق کو مسخ کرنے، عوام کو گمراہ کرنے اور چین پر دباؤ ڈالنے کی کوشش  کرتے ہوئے کی ہے۔

بیان میں کہا گیا ہے کہ ایک ذمہ دار بڑے ملک کی حیثیت  سے چین نے ہمیشہ بین الاقوامی قوانین کی سختی سے پاسداری  کی ہے اور تمام ملکوں  کی خودمختاری اورعلاقائی سالمیت کا احترام کیا ہے۔

بیان میں کہا گیا ہے کہ چین کے  بغیر پائلٹ غیر عسکری ہوائی جہاز کا امریکہ کی  فضائی حدود میں غیر ارادی طور پر داخل ہونا  خالصتاً ایک غیر متوقع اور الگ تھلگ واقعہ تھا جو فطری  قوت  کی وجہ سے پیش آیا ۔

 چینی فریق نے متعدد مرتبہ امریکہ اور عالمی برادری کو صورتحال سے آگاہ کیا ہے اور امریکہ سے کہا ہے کہ وہ اس  معاملے کو ایک پرسکون، پیشہ ورانہ اور معتدل  انداز میں مناسب طریقے سے  نمٹائے ۔

بیان میں کہا گیا ہے کہ تاہم امریکہ کی جانب سے چین کے  سنجیدہ مئو قف کو نہیں سنا گیا ، طاقت کا غلط استعمال کیا  گیا اور حد سے زیادہ رد عمل کا اظہار ہوا جو کہ  بین الاقوامی قانون اورروایتی طریقہ کار  کی روح کی سنگین خلاف ورزی  ہے۔

بیان میں کہا گیا ہے کہ امریکی کانگریس جان بوجھ کر تصادم کو ہوا دے رہی ہے اور  اس غیر متوقع اور الگ تھلگ واقعے  پر کشیدگی  پیدا کر رہی ہے، اس کو سیاسی رنگ دے  کرپیچیدہ بنا رہی ہے اور اسے بڑھا چڑھاکر پیش کررہی ہے جو کہ بالادستی کی ایک خالص مثال ہے۔

بیان میں کہا گیا ہے کہ جب یہ سوال آتا ہے کہ کون سا ملک جاسوسی کرنے والی سب سے بڑی طاقت ہے تو امریکہ اس کا جواب جانتا ہے اور دنیا بھر کے لوگ منصفانہ فیصلے کر سکتے ہیں۔

بیان میں کہا گیا ہے کہ چین نے امریکی  کانگریس پر زور دیا ہے  کہ حقائق ، بین الاقوامی قانون کے اصولوں اور بین الاقوامی تعلقات کے بنیادی اصولوں کا احترام کیا جا ئے اور چین۔امریکہ تعلقات میں مزید خلل اور نقصان پہنچانے سے روکنے کے لیے فوری طور پر چین کو بدنام کرنا بند کرے۔