بیجنگ (شِںہوا) چین کی  جنوب مغربی بلدیہ چھونگ چھنگ کے ضلع یونگ چھوان میں واقع گریٹ وال موٹر کمپنی لمیٹڈ (جی ڈبلیو ایم) کا مینوفیکچرنگ مرکز اب پوری صلاحیت کے ساتھ کام کررہا ہے جہاں محنت کش  سعودی عرب کے آرڈرز کو پورا کر نے کے لئے مخنت سے کام کر رہے ہیں۔

جی ڈبلیو ایم کے نائب صدر شی چھنگ کی کے مطابق جولائی 2022 میں سعودی عرب میں اپنے آغاز سے ٹینک 300 مشرق وسطیٰ کے اس ملک میں سب سے زیادہ فروخت ہونے والی آف روڈ گاڑی بن چکی ہے۔ یہ جی ڈبلیو ایم کے مقبول ماڈلز میں سے ایک ہے۔

شی نے کہا کہ کمپنی نے اپنی پہلی پک اپ کار 1997 میں مشرق وسطیٰ کو برآمد کی تھی۔ جولائی 2022 میں کمپنی نے اعلان کیا کہ اس نے بیرون ملک 10 لاکھ گاڑیاں فروخت کی ہیں جو ایک سنگ میل تھا جو غیر ملکی مارکیٹ میں رسائی بارے اس کے 25 سالہ غیر متزلزل عزم کی نمائندگی کرتا ہے۔

جی ڈبلیو ایم چھونگ چھنگ کا واحد ادارہ نہیں جو مشرق وسطیٰ کی مارکیٹ میں اپنی نظریں جمائے بیٹھا ہے ۔ گاڑیاں بنانے والی ایک اور معروف کمپنی چھونگ چھنگ چھانگ آن آٹوموبائل کمپنی لمیٹڈ نے بھی سعودی عرب کو گاڑیاں برآمد کرنے میں نمایاں پیشرفت کی ہے۔ کمپنی کے مطابق گزشتہ برس سعودی عرب کو برآمد کردہ گاڑیوں کی تعداد 35 ہزار یونٹس سے تجاوز کرگئی تھی جو گزشتہ برس کی نسبت 22 فیصد زائد ہے۔

چھانگ آن انٹرنیشنل کارپوریشن کے جنرل منیجر سونگ شوانگ نے بتایا کہ 1990 کی دہائی کے شروع میں چھا نگ آن نے مشرق وسطیٰ کی مارکیٹ تلاش کرنا شروع کی اور اب یہ سعودی عرب میں ایک مقبول چینی برانڈ بن گیا ہے۔

چائنہ ایسوسی ایشن آف آٹوموبائل مینوفیکچررز  کے مطابق 2022 میں چین کی گاڑیوں کی برآمدات 31 لاکھ 10 ہزار تک پہنچ گئی جو گزشتہ برس کی نسبت 54.4 فیصد زائد ہے۔

 چینی گاڑی سازکی انتھک کوششوں کی بدولت چینی گاڑیاں سعودی عرب، متحدہ عرب امارات اور مصر میں صارفین کے لیے نئے آپشنز لے کر آئی ہیں۔

فوسل ایندھن سے چلنے والی کاروں کے علاوہ نئی توانائی گاڑیاں بھی غیرملکی منڈیاں تلاش کررہی ہیں۔