بیجنگ(شِنہوا) چین تجارت اوراقتصادی تعاون کو فروغ دینے کی کوششوں کے تناظر میں وسطی ایشیا سے اپنی منڈی میں آنے کے لیے مزید معیاری مصنوعات کا خیرمقدم کررہی ہے۔
وزارت تجارت کے ترجمان شو جوئی ٹنگ نے جمعرات کو ایک پریس کانفرنس میں وسطی ایشیائی ممالک میں گودام قائم کرنے کے لیے اپنی کمپنیوں کی حوصلہ افزائی کرتے ہوئے کہا کہ چین وسطی ایشیائی کاروباروں کے لیے اپنے ای کامرس پلیٹ فارم کھولے گا۔
شو نے کہا کہ چین وسطی ایشیا کے ساتھ ڈیجیٹل تجارت کو وسعت دے گا اورمصنوعی ذہانت، بگ ڈیٹا اورفائیوجی جیسی جدید ترین ڈیجیٹل ٹیکنالوجیزتیارکرنےمیں تجربے کا تبادلہ کرے گا۔
ترجمان نے کہا کہ چین سرحد پاربنیادی ڈھانچےکی سہولیات کی تعمیرکوفروغ دے گا، تیل، قدرتی گیس، نئی توانائی کے معدنیات اور دیگر شعبوں میں تعاون کو مضبوط کرے گا اور وسطی ایشیائی ممالک سے معیاری زرعی پیداوار کی درآمدات کو وسعت دے گا۔
چینی وزارت کے تازہ ترین اعداد و شمار کے مطابق چین اور وسطی ایشیا کے پانچ ممالک جیسے قازقستان، کرغزستان، تاجکستان، ترکمانستان اور ازبکستان کے درمیان اقتصادی اور تجارتی تعاون میں ٹھوس پیش رفت ہوئی ہے۔
وزارت کے مطابق پانچ ممالک کے ساتھ چین کی تجارت 2022 میں 70 ارب ڈالر تک پہنچ گئی اور اس سال کی پہلی سہ ماہی میں اس میں گزشتہ سال کی نسبت 22 فیصد اضافہ ریکارڈ کیا گیا۔
شو نے کہا کہ چین کثیر الجہتی فریم ورک کے اندر وسط ایشیائی ممالک کے ساتھ تعاون کو بھی فروغ دے گا اور ترکمانستان اور ازبکستان کی عالمی تجارتی تنظیم میں جلد شمولیت کی حمایت کرے گا۔
