بیجنگ(شِنہوا) شمالی نصف کرہ سے پورے آسمان کا مشاہدہ کرنے کی صلاحیت کی حامل وائڈ فیلڈ(وسیع علاقے کی) دوربین جلد ہی چین کےشمال مغربی صوبے چھنگھائی میں کام شروع کردےگی۔ 2.5 میٹر قطرکے ساتھ وائڈ فیلڈ سروے ٹیلی سکوپ (ڈبلیو ایف ایس ٹی) شمالی نصف کرہ میں ٹائم ڈومین سروے کی سب سے بڑی دوربین ہے۔ اسے چین کی یونیورسٹی آف سائنس اینڈ ٹیکنالوجی اور اکیڈمی آف سائنسز کے ذیلی ادارے پرپل ماؤنٹین آبزرویٹری نے مشترکہ طور پر تیار کیا ہے۔ آبزرویٹری کے مطابق، یہ دوربین ممکنہ طور پر ستمبر کے وسط میں کام شروع کر دے گی، جس سے سائنسدانوں کو متحرک فلکیاتی مظاہر کی نگرانی اور ٹائم ڈومین فلکیاتی مشاہدے کی تحقیق کرنے میں مدد ملے گی۔