بیجنگ(شِنہوا) چین کے ثقافتی شعبے اوراس سے متعلقہ بڑے کاروباری اداروں کی رواں سال کی پہلی تین سہ ماہی میں مشترکہ آمدنی میں مسلسل اضافہ ہوا ہے۔

قومی شماریات بیورو کے اعدادوشمار کے  مطابق، جنوری سے ستمبر تک، ان اداروں کی مجموعی آمدنی 91کھرب 60ارب یوآن (12کھرب 80ارب ڈالر)  ریکارڈ کی گئی ، جو کہ ایک سال پہلے کے مقابلے میں 7.7 فیصد اور سال کی پہلی ششماہی کے مقابلے میں 0.4 فیصد پوائنٹ زیادہ ہے۔

قومی شماریات بیورو کے ایک سینئر ماہرشماریات ژانگ پھینگ نے کہا کہ ثقافتی صنعت نے پہلی تین سہ ماہی میں بہتری کی رفتار کو برقرار رکھا کیونکہ اقتصادی کارکردگی میں اضافہ ہوا، مارکیٹ نے اپنی صلاحیت  کا اظہار کیا اور حکومت کی معاونت کی پالیسیاں شروع ہوئیں۔

اعداد و شمارکے مطابق پہلی تین سہ ماہی میں بڑے کاروباری اداروں کے منافع میں گزشتہ سال کی نسبت31.4 فیصد اضافہ ہوا۔ ژانگ نے کم موازنہ کی بنیاد اور کاروبار میں تیزی سے بحالی کو اس اضافے کی وجہ قرار دیا ہے۔