ہانگ کانگ (شِنہوا) چین کے ہانگ کانگ اور ملک کے شمالی بندرگاہی شہر تیانجن نے تیانجن (ہانگ کانگ) سرمایہ کاری ماحولیات کانفرنس کے دوران 15 ارب یوآن (تقریبا 2ارب 20کروڑ ڈالر) سے زائد مالیت کے تعاون کے 19 منصوبوں پر دستخط کیے ہیں۔

ہانگ کانگ کنونشن اینڈ نمائش مرکز میں منعقد ہونے والی اس کانفرنس میں 300افراد نے شرکت کی،جس کامقصد تیانجن اور ہانگ کانگ کے درمیان تجارت اور سرمایہ کاری تعاون کوفروغ دینا تھا،طے پانے والے منصوبوں میں سمارٹ مینوفیکچرنگ، بائیو میڈیسن اور انفراسٹرکچر کے شعبوں کا احاطہ کیا گیا ہے۔

ہانگ کانگ خصوصی انتظامی خطے(ایچ کے ایس اے آر) کے چیف ایگزیکٹو جان لی نے اپنے ویڈیو خطاب میں کہا کہ ہانگ کانگ اور تیانجن کے درمیان خاص طور پر مالیاتی جدت، پیشہ ورانہ خدمات اور جدید ٹیکنالوجی کے شعبوں میں ترقی کے بہت سے مشترکہ مواقع موجود ہیں۔

انہوں نے کہا کہ تیانجن اور ہانگ کانگ ایک دوسرے کے ٹیلنٹ،مہارتوں اور وسائل سے استفادہ کرتے ہوئے مزید ٹھوس اور وسیع تعاون کو فروغ دے سکتے ہیں۔

تیانجن کے نائب میئر ژوپھینگ نے کہا کہ بین الاقوامی بندرگاہی شہروں اور بیلٹ اینڈ روڈ پرواقع اہم ٹرانسپورٹ مرکزکی حیثیت سے تیانجن اور ہانگ کانگ کے درمیان تعاون اور تبادلوں کی ایک طویل تاریخ ہے۔