یروشلم(شِنہوا) چین کی کمپنی، گوانگژو ای ہانگ انٹیلیجنٹ ٹیکنالوجی، اسرائیل میں اپنی آٹو پائلٹ "ایئر ٹیکسی" کی نمائش کرے گی۔

اسرائیل کی سول ایوی ایشن اتھارٹی (سی اے اے) کے مطابق ای ہانگ 216 ایس نامی یہ ڈرون  500 میٹر کی بلندی پر 130 کلومیٹر فی گھنٹہ کی رفتار سے پرواز کرتے ہوئے دو مسافروں کو لے جا سکتا ہے۔

اسرائیل میں اپنی نوعیت کے اس  پہلے مظاہرے کا انتظام سی اے اے  اور اسرائیل انوویشن اتھارٹی کرے گا۔

سی اے اے نے کہا کہ یہ مظاہرہ اسرائیل میں ڈرون سے متعلقہ ٹیکنالوجیز کو فروغ دینے کے لیے سی اے اے کی زیرقیادت منصوبے کا حصہ ہے اور یہ کہ ای ہانگ ڈرونز میں سے دو کو اسرائیل پہنچا دیا گیا ہے۔

آزمائشی پروازوں میں حصہ لینے والی اسرائیلی ایوی ایشن کمپنی کینڈو ڈرونز نے کہا کہ ہوا بازی کے اجازت نامے موصول ہونے کے بعد ڈرونز جون میں آزمائشی پروازیں شروع کرسکیں گے۔