بینکاک(شِنہوا) تھائی لینڈ کی وزارت تجارت کی  ایک تحقیق کے مطابق چین کی تیزی سے بڑھتی ہوئی ای کامرس مارکیٹ نے سرحد پار تجارت میں اضافے کے ساتھ تھائی کاروباری اداروں کو ممکنہ فوائد فراہم کیے ہیں۔

 وزارت کے ٹریڈ پالیسی اینڈ اسٹریٹجی آفس (ٹی پی ایس او) کی جانب سے جاری کردہ تحقیق کے مطابق چینی ای کامرس مارکیٹ کی توسیع کو نوول کرونا وائرس کے تناظر میں صارفین کے رویے میں تبدیلی اور انٹرنیٹ صارفین کی بڑھتی ہوئی تعداد کی وجہ سے تقویت ملی ہے جنہوں نے آن لائن خریداری کا انتخاب کیا ہے۔

تحقیق کے مطابق چینی حکومت نے قواعد و ضوابط نافذ کیے ہیں اور 33 بڑے شہروں میں 165 پائلٹ کراس بارڈر ای کامرس (سی بی ای سی) زون قائم کیے ہیں۔

 تحقیق  میں کہا گیا ہے کہ یہ زون غیر ملکی ویب سائٹس پر چینی مصنوعات کی فروخت اور چینی ویب سائٹس پر غیر ملکی مصنوعات کی فروخت کی سہولت فراہم کرتے ہیں۔

سی بی ای سی کے ذریعے ٹریڈنگ چینی مارکیٹس میں رسائی حاصل کرنے کی کلید ہے۔

 ٹی پی ایس او کے ڈائریکٹر پون پونگ نیناپکورن نے رپورٹ میں کہا کہ اس سے تھائی تاجروں کو اپنے ٹیکس فوائد کے ساتھ ساتھ تیز اور آسان کسٹم طریقہ کار کی وجہ سے مواقع بڑھانے میں مدد ملے گی۔