بیجنگ (شِنہوا) وزارت خزانہ کے اعداد و شمار کے مطابق چین میں لاٹری ٹکٹس کی فروخت اگست میں 53.6 فیصد اضافے کے ساتھ 52.96 ارب یوآن (تقریباً 7.38 ارب امریکی ڈالرز) رہی۔

اعداد و شمار کے مطابق گزشتہ ماہ فلاحی نظام کو سہارا دینے کے لیے لاٹری ٹکٹس کی فروخت تقریباً 18.64 ارب یوآن رہی جو ایک سال قبل کے مقابلے میں 47.1 فیصد یا 5.97 ارب یوآن زیادہ ہے۔

وزارت نے کہا کہ کھیلوں کی صنعت کو سہارا دینے کے لئے لاٹری ٹکٹس کی فروخت گزشتہ سال کی نسبت  57.4 فیصد اضافے کے ساتھ 34.31 ارب یوآن تک پہنچ گئی۔

چین کے لاٹری مینجمنٹ قوانین کے تحت ٹکٹس کی فروخت سے حاصل ہونے والی رقم انتظامی اخراجات اور عوامی فلاح و بہبود کے منصوبوں اور انعامات کے لیے استعمال کی جاتی ہے۔