بیجنگ (شِنہوا) چینی قومی مقننہ ،14 ویں قومی عوامی کانگریس نے لی چھیانگ کی بطور وزیراعظم توثیق کردی ہے۔ انہیں صدر شی جن پھنگ نے اس عہدے کےلئے نامزد کیا تھا۔

اجلاس میں شی جن پھنگ، لی چھیانگ ، ژاؤ لی جی، وانگ ہوننگ ، ہان ژینگ، تسائی چھی، ڈنگ شوئے شیانگ اور لی شی نے شرکت کی۔

شی جن پھنگ نے توثیق کے فوری بعد لی کی بطور وزیراعظم تقرری کے صدارتی حکم نامے پر دستخط کردیئے۔

جولائی 1959 میں پیدا ہونے والے لی نے اپریل 1983 میں کمیونسٹ پارٹی آف چائنہ میں شمولیت اختیار کی تھی۔ وہ سینٹرل پارٹی اسکول سے فارغ التحصیل ہیں اور انہوں نے  ایگزیکٹو ایم بی اے ڈگری حاصل کر رکھی ہے۔

لی کمیونسٹ پارٹی آف چائنہ کی 20 ویں مرکزی کمیٹی کے سیاسی بیورو کی قائمہ کمیٹی کے رکن اور ریاستی کونسل کے سرکردہ پارٹی ارکان گروپ کے سیکرٹری ہیں۔

قومی عوامی کانگریس کے نائبین نے عوامی جمہوریہ چین کے مرکزی فوجی کمیشن کے نائب چیئرمین کے لئے ژانگ یو شیا اور ہی وائی ڈونگ کے ناموں کی توثیق بھی کردی۔ انہیں عوامی جمہوریہ چین کے مرکزی فوجی کمیشن کے چیئرمین شی جن پھنگ نے نامزد کیا تھا۔

مرکزی فوجی کمیشن کے ارکان کے لئے لی شانگ فو، لیو ژین لی، میاؤ ہوا اور ژانگ شینگ مین کے ناموں کی توثیق کی گئی۔

نائبین نے لیو جن گو کو قومی نگراں کمیشن کا ڈائریکٹر، ژانگ جن کو اعلیٰ عوامی عدالت کا صدراور ینگ یونگ کو اعلیٰ عوامی استغا ثہ کا پراسکیوٹر جنرل منتخب کر لیا۔

اسی اجلاس میں مجموعی طور پر 159 افراد کو 14 ویں قومی عوامی کانگریس کی قائمہ کمیٹی کا رکن منتخب کیا گیا۔

نئے منتخب وزیر اعظم نے آئین سے وفاداری کا حلف اٹھایا اور اسی طرح  نئی قیادت اور قانوں سازوں نے عہد کیا۔