بیجنگ(شِنہوا) چین آئندہ آٹھ روزہ قومی دن اور خزاں کے وسط کے تہوار کی تعطیلات کے دوران ہر روز مقامی فضائی مسافروں  کے 19 لاکھ 60 ہزار سفری دوروں کی تیاری کر رہا ہے جو 2019 میں انہی تعطیلات کے لیے ریکارڈ کیے گئے اعداد و شمار سے 17 فیصد زیادہ ہے۔

چین کی سول ایوی ایشن ایڈمنسٹریشن کے اہلکار جن جون ہاؤ نے ایک پریس کانفرنس میں بتایا کہ تعطیلات کے دوران  29 ستمبر سے ہر روز ملکی سطح پر14 ہزار  پروازیں چلائی جائیں گی جو 2019 کی سطح سے 18 فیصد زیادہ ہے۔

انہوں نے اعداد وشمار کا حوالہ دیتے ہوئے کہا کہ اندازہ لگایا گیا ہے کہ آٹھ دنوں کے دوران 2 کروڑ 10 لاکھ سے زیادہ لوگ ہوائی جہاز کے ذریعے مقامی یا بین الاقوامی سفر کریں گے جس سے تعطیلات کے دوران سفری دوروں کی مضبوط مانگ کی عکاسی ہوتی ہے۔

انتظامیہ نے کہا کہ وہ بین الاقوامی مسافر پروازیں دوبارہ شروع کرنے پر کام کر رہی ہے، فی الحال ہفتہ وار بین الاقوامی مسافر پروازوں کی تعداد 2019 کی سطح کے 52 فیصد پر ہے۔

تاہم برطانیہ، اٹلی اور مالدیپ سمیت 14 ممالک کے لیے پروازوں کی تعداد کوویڈ- 19سے پہلے کے اعداد و شمار سے زیادہ ہو گئی ہے۔