بیجنگ (شِنہوا) چین کے ماہرین صحت نے ایسے وقت میں جب ملک کی عمر رسیدہ آبادی میں اضافہ ہورہاہے، بوڑھے افراد کومتاثر کرنے والی بیماریوں سے نمٹنے کے لیے ویکسین تیار کرنے اوراس عمر کے افراد میں ویکسی نیشن کے فروغ کے لیے جدید طریقے وضع کرنے پر زور دیا ہے۔

 چائنہ ڈیلی کی ایک رپورٹ کے مطابق چین کے امراض پر کنٹرول اور تدارک مرکز کےسابق ڈپٹی ڈائریکٹرپریونٹیو میڈیسن ایسوسی ایشن کے نائب صدرفینگ ژیجیان  نے کہا کہ جیسے جیسے چینی معاشرے میں عمر رسیدہ افراد کی تعداد میں اضافہ اور 1960 کی دہائی میں پیدا ہونے والے لوگ بوڑھے ہو رہے ہیں، ملک کو ان کے لیے مناسب سماجی، طبی اور بحالی خدمات کی فراہمی میں بہت دباؤکا سامنا ہے اور یہ صورتحال آئندہ بھی رہے گی۔

انہوں نے کہا کہ بڑھتی ہوئی عمر رسیدہ آبادی کو انفیکشن کے زیادہ خطرے کا سامنا ہوگا ہمیں بڑھاپے کے دوران انفیکشن کو کم کرنے کے لیے مزید ویکسین کی ضرورت ہے۔  قومی ادارہ شماریات کے مطابق، 60 سال اوراس سے اوپرکی عمرکے افراد گزشتہ سال ملک کی آبادی کا 19.8 فیصد تھے اور ایک اندازے کے مطابق آئندہ 15 سال میں یہ تناسب 30 فیصد تک پہنچ جائے گا۔